المعنسات برع لو سمحتوا .. قلنا للمعاريس اليدد ..أو بالاصح “على وش جوازه “ مب الجواز الباسبورت..لا الزواج بالمصري أقصد ..

 خطرت في بالي فكرة .. ان في هالبوست أطرح أفكار أو احدث صيحات الموضة لهن .. من بداية العرس لين نهاية يومه الطويل و الشاق .. : ) ..!!

 تصدقون يقولون ذوقي حلو .. و عن نفسي لازم أهتم في كل صغيرة و كبيرة  في مظهري .. “أكيد الحين تقولون حلاة الروح” بس شبعنا من هاي الرمسة ..مثلا عندنا عرس ..تلقوني قبلها بشهور ادور على موديل و ارسمه في بالي ..و اخذ فكرة من هالفستان اركب على فستان ثاني لين ما يطلع الفستان النهائي ..و أسير عند المصمم ..مب بس جي حتى أفكر في شعري كيف بسويه ..يعني ما اتريا راعية الصالون تختار عسب ما اكون “طوفة هبيطة” ..!!

 الحمد لله كل فساتيني تنال اعجاب العذارى و العوانس و بنات حواء ..و وايد طلبوا مني اعارة “لاعب أجنبي جي؟” … بس أختكم تعطي كل شيء حق الناس الا فساتين الاعراس ..”أخاف” ..!!

 ||

 

\\

 

||

 

بسم الله

 الفكرة هي ..ان العرس يكون في الهواء الطلق .. فديت دبي فيها أماكن تستوي حق تنظيم أعراس في خارج نطاق الجدران ..طبعا يوم الجو يكون بارد ..و يا حبذا لو بأول السنة ..

 

 

حركة القفص العود .. هاي اما تكون لقطع الكعكة ..أو لمرور العروس فيها ..و طبعا التزيين يكون بذلك الشكل ..بس طاولة الشرب “ما نباها” بنخلي غرش عصاير أشكال و أنواع ..يعني ما لذا و طاب..

 

 

بس شوفوا انا ما تعجبني هاي اليلسة التقليدية.. يعني اقترح تكون الكراسي مصففة بدون طاولات ..أو كراسي مصففة و جدامهم طاولات طويلة مب مدورة..شرات اللي في الصورة بالضبط بالملي قوووووووووووووول .. : )

 

 

و أطراف المكان انحط مثل هاي الاشجار ..لازم طبعا نراعي الالوان ..لكن اهتمامي أول منصب على الرموز ..لكن توحيد الالون في بالكم ..رسموه

و شجرة كبيرة تكون هي الكوشة ..و لابقة ليتات ذهبية .. هنا لازم تعرفين عزيزتي العروس ان لازم فستانك يكون بسيط ..

 عسب ما يستوي كل هالجو يكون فخم ..و أنت فخمة أقصد وايد تلقين ..و ألحين مادري ليش العرايس لبسهم وايد يبرق و يلقون من بعيد ..والله حلاة العروس بفستانها الراقي البسيط ..لأن هي اللي بتحلي الفستان ..نظرية حلوة صح؟ ..جمالك لازم تبرزينه مب فستانك !!

 

 

هذا الفستان هو أكبر مثال ..بسيط و راقي ..حاليا الفساتين قصة الصدر لازم تكون جي ..ف هلا هلا بالريجيم القاسي حتى الموت.. طبعا شيء فساتين أحلى ..لكن ما ابى اكشف كل اوراقي ..لأن الصور اللي بحوزتي ما تنشر كلها قبل لا اعرس ..عيل ازوجكم و اخطط لكم ..و حزة ما اولي ..تموت الافكار كلها؟!

لا أنتوا ترضون و لا ربكم يرضى ..الايثار حلو بس مب بشكل مبالغ فيه : )

 \\

 

||

 

على هذا الفستان ..احس الافضل ان يكون المكياج فرنسي .. اللي أفلام اول كانن الممثلات يركبن رموش من بعد كيلو يبينون..قريب من الهندي هو …

 

أما عن المسكة ..تعجبني المسكات البسيطة ..و بس خلاص ودروا الجوري ..لين متى بتمون على الجوري ..؟!

This Flowers “Tulips

 أحسن نوع بس لا تكثرون شرى اللي في الصورة ..لا كل ما كانوا كبار و اعدادهم اقل ..كل ما كانوا اجمل..

الأبيض طبعا ..

هذا بعد أنيق عجبني الصراحة ..

بلا تردد و أنتي مغمضة ..اختاري شوبارد

على الفستان المذكور ..ما يطيح عليه الا هاي النوعية من الألماس الشكل الدائري

||

\\

طبعا آخر شيء وزعي على المعازيم هاي الهدية ..يا حبذا لو بس اللون الذهبي لانه يطابق مع الديكور

و لا تنسين تخلين كارت واحد للذكرى

بطاقة العرس لا تنسونها ..بس مب وردي ..ذهبي ..!

و بالرفاء و البنين ..!