• تاخذلك لفة في المستشفيات الحكومية اللي في دبي ..قسم قسم بشوف أجانب من كل الجنسيات مرقدين ..و يوم اييهم مواطن حالته خطيرة يقولون ما عندنا مكان .. و لا حالته خطيرة شو نسوي فيه مرده يموت..يعني شو ؟ .. والله المواطن أولى ..هذا المواطن في بلاد المطيحين في مكانه ما يرضون يتعالج ببلاش .. لكن العتب مب عليهم على اللي عندنا مسوين عمارهم في كل شيء “هيئة حاتم الطائي” ..سمعت من فترة قصة شاب مواطن تعرض لحادث .. الشاب كان يعاني من نزيف في المخ و ما يدري لان عقب الحادث بفترة حس بألم في راسه ..المهم يوم سار المستشفى قالوله ما فيك شيء ..لكن باصرار حد من أهله طلبوا ان يسوون له أشعه ..عقب اكتشفوا ان فيه نزيف ..و رقدوه في العناية المركزة و متوفي “سريريا” ..و كل ما دزوا تقرير لأي مستشفيات ثانية قالوا ما نستقبله ..لين ما عطاكم عمره..تعرفون شو ما أقول غير “تف” عليهم يوم أن وصلوا هذا الشاب لهاي الحالة ..و طبعا حالات لا تعد و لا تحصى..مب قهر؟! .. ألحين أنا و غيري أهلنا يمكن يسفرونا لكن شيء وايدين مب قادرين.. يعني الحل يموت ؟..و اذا فرضنا سفره مب الحل لأن الوقت ما يسمح..استقبلوه ..على الاقل اهله يحسون انهم حاولوا .. !

  • تسيرين الجمعية أيام الاجازة بوقت العشاء .. طبعا زحمة .. المهم توقفين في الدور حق الحساب ..اللي على الكونتر يلس يفرفر بالاغراض لان كاره عمره من كثر المستهلكين في أيام الاجازة ..طبعا في هاي الحالة تزاعجين عليه “شو نشتري ببلاش نحن من عندكم؟” ..و يكون واقف وراج شاب و بايده غرشة “ديو” بس ..يالله عليك داش الجمعية عسب ديو ..ليش عيل مسوين دكاكين؟ ..لكن موقف ثاني يستويلج راعي الكونتر يتحرى هذا الشاب..ريلج ..عاد تخيلوا يعطيه الباقي من الخردة ..طبعا حزتها “حسيت أنه خدش عنوستي” .. لكن بطريقة لبقة قلت له يا بابا هذا الاخ مب وياي ..طبعا ما فهم علي و لكن أشرت بايدي عسب اخذ خردتي ..و مناك الشاب “منطر” من الضحك ..و القهر يلحق لين باب السيارة وأونه يعتذر على اللي استوى ..طبعا أنا كنت متفاجئة قلت شو السالفة ..لا لا لا عادي ..خلاف يقول شو الاريكسون سهل الاستخدام ..طوالي شفت يدي ..قلت في خاطري ..يقصد تيلفوني ..بعد طوالي بطلت فمي ..لهالدرجة الوقاحة و “الفياقة” و الدنيا حلوة عند بعض الشباب ..ما بقول المراهقين..لأن اعطيه في آواخر العشرين ..هالسن لازم يكون مودع المراهقة ..بس شو بنقول غير كان يوم أسود يوم سرت الجمعية هاي..!!

  • موقف آخر في الجمعية ..صوب الكريمات و الشامبو و الصابون ..تدرون البنات لازم يوقفن ساعة لين ينقون اللي يبن ..عاد أنا سرحانه أفكر شو باخذ و شو ما باخذ ..و احصلكم دزة قوية من وحدة ويا الترولي مالها في خصرتي والله كانت .. شفتها بنظرة صدق حقيرة “من العوار” ..روحي كنت كارهة عمري لأسباب فيسولوجية .. قالت السموحة اختي وراي دوام ..من تضاريس شكلها حسيت انها مال شيفتات المطار ..مادري ليش ..قلت لها حصل خير حصل خير ..بعد شوي اسمعها من القسم الثاني ازاعج في التيلفون ..تقول تبين دوف و لا هربل ..لا يكون جمعيتها و أنا مادري..”صدق صوت المرأة عورة”؟

  • أكره شيء ..اداوم في مكان شيء مهندة .. و لحظتها عندك شيء في الشغل لازم تركز فيه .. يا ليت أي هندي أو هندية ..اللي رمستهم تعور الراس و الاذن .. و ما ودك ساعتها الا تشل الكمبيوتر و تفره على راسهم ..عفية شعب ما يتعب من الاكل و الكلام و الشغل و فرك الكريم من الصبح لين آخر الدوام..

  • أخس شيء عندي حد يتفلسف في الدين .. و الطرف الاخر يكون شخص عادي ..يعني مب مطوع و لا شيخ ..في مسيد الدوام كانت وحدة تصلي و حاطة شنطتها جدامها ..ماركة “ديور” ..يت وحدة مسمتنها أنا “مفتية زمانها” ..شلت شنطتها و خلتها على الطرف..عقب المسكينة يوم خلصت الصلاة ..تقولها أختي لا يجوز تصلين حق الشنطة و اسم ديور..بالذمة مب خاطركم تصفعونها؟! 

  • من بعد ما الضغط ارتفع من المواقف اللي في أول البوست ..خلوا رشة العطر تحسسنا ان الدنيا حلوة ..!!

  •  ”لكل عطر حكاية ..و لكل حكاية نهاية”

  

هالسطر كنت أقوله قبل لعطر معين .. أحيانا تحسون ان شي عطور معينة ما نروم نستغني عنها ..

 من تخلص نشتري غيرها .. كنت قبل أيمع حتى الغرش ..

 بعدين طفرت ما اصدق عطر يخلص سيده فريته ..

 حتى تخف الزحمة اللي في “الكبت” ..!

أحب العطور الفرنسية ..و العربية بس مب كل شيء في العربي ينحب ..

أموت في دهن العود “السيوفي و الشيوخي و الكمبودي” فقط !! مستوية حتى راعية عطور ..اللي في النت و برع النت يسألوني شو أحلى عطر ..و شو اليديد نازل ..؟ .. مرة بلشنا ناس ..كانوا هاديني عطر ما كنت أعرف قيمته .. و الريحة صدق عجيبة ..يوم ساروا يشترونه انصدموا في السعر .. p:  ..اليوم الثاني يقولون لي أنتي “مال فقر” أول مرة نشتري عطر بـ700 ..! :( يوم بتنصحينا بعطر ..طوالي ذكري سعره ..!

 هاي العطور اللي أحبها ..

نينا ريتشي..أمس خلص العطر للأسف ..4 غرشة أخذها ..!!

سينما ..ماشي سوقه ألحين في ”كبتي” .. القديم دايم يكون أصيل..

من أحلى العطور جادور ..بس مسوية مقاطعة ..مب شارية مرة ثانية

 واااااااو ..الاخصر و الاحمر روعة ..لكن الريحة ما تم وايد ..

 

هالعطر .. من اسكادا..”خوش فله على قولة البلام” ..

 

 شانيل ..بطلت آخذه ..مقاطعة ثانية..

 جست مي ..لباريس هلتون ..

 

 

بلاشك ..Gucci الوردي

 

 

هالعطر ستيل ..شهر ما تخوز الريحة .. P:

 

أخيرا كل مجموعة “M” P.PICALLEF

حاولت أدور صور لعطوره بس ما حصلت في النت .. غالية جدا عطوره ..

  مميز كل صنف فيه .. بالشكل و الرائحة ..تعيبني الغرش اللي عليها فصوص ..

عمري ما سرت المحل عسب آخذ  .. دوم أحصل هدية ..!

أسعاره من 700 و ما فوق ..الله يخلي البابا .. $: >> و لا خسي أدفع حق عطر أكثر من 500 P: !!

 

 

||

\\

||

” بيتنا مظلم ..!! “

أمسات سافرت مدبرة المنزل “ميلا” .. محبوبة الجماهير .. معشوقة الفريج ..لمدة شهر “عاد بدز سفرناها” عسب اشوف أهلها ..

هي ما تبى تسافر ..3 سنين مب شايفة أهلها و لا عيالها ..

عنبو ..مب دبي مخبلتنها لهالدرجة ..! 

خدامتنا هاي أكثر من عشر سنين عندنا .. سبحان الله من تسع سنين كانت ذكية و ما عليها ملاحظات ..

و مال شغل و ما تسوي “قرقر” وايد..

لكن السنة العاشرة ..مادري شو ياها ..!!

استخفت العيوز .. قامت تخورط وايد ..  شكلها خرفت ..

من اشوف لمة شباب تستانس الحلوة ..دق سوالف و اندماج ..

 ناقص بس تربع ريولها و ترمس ياهم عن قضية الشرق الاوسط ..

و يا حبها للأكل .. تبلع الخضر و اليابس ..لكن الجسم و لا باريس هيلتون ..p:

أحيانا ادش الغرفة و تقول شو أنتي متى في زواج؟ .. أقولها ليش عندج ريل؟ ..

تقول خلاص كبيرة أنتي ..لازم أنا يشوف عرسج أنتي ..

أقولها ان شاء الله من ايي حبيب مال أنا ..بخبرج أنتي أول شيء P: !

أفكر يوم أعرس ..ألبسها فستان أبيض ..وصيفتي تكون بدال خواتي الصغار ..

شو الراي؟!  D : ..

 

تعالوا يوم شيء نقاش حاد بينها و بين أمي ..

لازم أكون أنا الحكم بينهم ..

من تنتهي المناقشة ..أقول حق أمي سفريها خلاص ..بلا صدعة و بلا حنة

ترد تقول عقب ساعة ..لا حرام

زين حرام .. !!

صدق برودها أحيانا يقهر .. و يوم تستوي “طمة” ..

ودك تاخذ شيء و تفلعها ..

ألحين صدق البيت مظلم .. حتى طلباتي واقفة .. الخدامة الثانية ما تعرف لأنها يديدة ..

مثلا لو عندي شغلة في الجمعية ..كنت أطرشها

لكن ألحين “رغما عن أنفي” لازم أنا اسير .. :( !!

::

:: 

“ميلا مخسن” ..لج وحشة ..لين آخر شهر 7 ..نحن في انتظارك :( !

 

||

 

\\

 

\\

 

 ||

 

نظام “سالك” .. اسلك.. دوس و أنت و الخير رباعة ..!!

 

 

يوم الخميس ..وقت الذروة ..ترى نحن الذروة مب بس الظهر عندنا ..

بعد.. المغرب على جسر قرهود ..

هالوقت يكون كريه لو تسوق ..

زحمة من الخاطر ..أنا لو أسوق هالوقت “أًصلي على النبي” ..!!

لأن صدق “طفرة” تيلس تسب في العالم سب اليهد ..

لكن هالخميس مرينا على جسر قرهود في أقل من دقيقة ..”تشبيه قوي” أدري ..

الناس تتحرى ان طبقوا نظام سالك ..

الصراحة كانت بروفا حلوة ..تخيلنا كيف بيكون الحال بنظام سالك ..

صدق صدق فرحنا ..

التطبيق بيكون أول من شهر سبعة ..!!

على فكرة .. التطبيق ما بيكون مقتصر على شارع الشيخ زايد و جسر قرهود ..

بيمتد لشوارع ثانية ..مع الايام القادمة..

أحسن ..عسب تخف الزحمة ..

و عسب ما يطلعون الناس وايد..

مع ان وحليلهم المواطنين ..راس مالهم يوم يطلعون في الاسبوع..

الكلام حق الجنسيات اللي صدق يبالهم “كف”..

عنبوا بارك ما نحصل ..

شو كل يوم طلعة عائلية عندهم؟!

 

 

\\

 

 

\\

 

\\

 

 

دخيلكم ..لا تيبون لنا ..كاكو و لا ولد عمه ..

كل ما دشيت غرفة أمي ..خذت حبة ..

ملانة خذت حبتين..

يوعانة خذت ..

مضايقة خذت ..

أنا اللي ما احب الكاكو حتى لو باتشي ..قمت آكل ..!!

ما نبى الناس توجبنا ..وجبونا بألماس بسيارة راضين لكن أكل حلو و مالح ..خلاص بطلنا نستقبل ..!! :(