:: مشروع رقاصه ::

أعتذر على الغياب .. الاسبوع هذا كان جدا مزحوم ..ضغوطات نفسية ..

 ارتفاع درجة حرارة جسمي “محمومه” ..

لم أكن على ما يرام ..

اضافة الى ذلك بداية الكورسات و التي تستمر الى شهر 12 ..

الكورسات مختصة في مجال عملي ..

و أيضا “شوي” المود زفت كان .. و الحمد لله أشعر بتحسن اليوم ..

شكر خاص للعزيزة “بحرينية” على السؤال و أيضا “بنت الأجواد” ..

فيكم الخير خواتي : ) !

 ننتقل لبوست ”مشروع رقاصه” .. !

||

||

  

  

عاد لا تشهقون .. و تقولون عيب شو تقول هاي ..!!

بس تدرون أيام عنفوان الطفولة و المراهقة.. و الجاهلية.. هابين نحن البنات بالأغاني ..و الرقص .. و اليوله!!

حتى عراقي عرفنا ..و الله يخلي البرتقالة  !!

سعودي و عرفنا ..خاصة على اغنية “حمام مادري شو و لا سلم علية ” ..!!

يا هي أيام ..

منيلة ..

نينا و ريدا كنت أنا وحدة من الأهل الله يستر علينا ..!!

تبت والله ..

و توبتي من بعد عرس ولد خالي ..

يوم سرت فوق على الكوشة و دش المسمار في ريولي ..

كان يوم أسود ..

و على شو على أغنية كريهة منتشرة في الامارات ..

واااااااي كنت صدق وايد أفشل ..!!

مب أفشل الا جي حسيت عمري مال خبري خبركم دينا الرقاصة..

شعور خايس يا ربي ..

:P

كنت ذاك اليوم حدي كاشخة ..

فستان لولو ..

لابسة  off white

أيرب كيف علية قبل لا اعرس خخخخخ حلو و لا لا ..!!

و كنت توني مخلصة من الريجيم القاسي حتى الموت..

و مسوية هايج التسريحه و حاطة فيونكات و لولو في راسي ..

و مكياج اليسا على قولة يمنى راعية الصالون ..

و طايحة تمديح أونة أنتي تذكريني في جوانا ملاح ..

جوانا طل ..من زينها عاد ..

تعالي في عرسج والله لا اسويلج نص السعر ..

:(

بصراحة هي مكياجها “شيء محصلش” ..

المهم كل ما اسير لها

تنفخني تنفخني تنفخني ..

و الايرانية اللي وياها تقولي أنتي مواطنة؟!

قلت لا ..

قالت أقول شكلج غير بالعادة بنات الامارات سمر حنطاويات ..

أنتي بيضاء ..

لبنانية ؟

لا عراقية ؟

قلت وااااااااااااااااااي ..

اماراتية أب عن جد ..

بطن و ظهر ..و كل ما أسير مكان..

قالولي أنتي مصرية؟

لبنانية؟

أخر شيء وصلوله عراقية ..!!

كلش بصوب و يقولون ناس أنتي أمج أم مي عز الدين ..

بلعنا جوانا ملاح

هالدور مي عز الدين ..!!

خلوها على الله ..

قمت أشك أن أمي مب أمي ..

لكن يوم أذكر ملامح يدتي الله يرحمها ..و كلامها عني

أقول “يخسون” .. والله .. اماراتية أنا ..أنا اماراتية ..!!

خلوني أكمل القصة .. انزين ..

و عيون المعازيم و اللي أعرفهم ..

ينفخوني ينفخوني ..

خاصة هايج اللي ما رضيت أخذ ولدها ..

: (

من أشوفها تصد عني ..

زين نعرف هالحركات ..!!

لين ما طحت هايج الطيحة ..

آخ كان المسمار صدق يعور ..!!

و أمي تقرأ علي ..الله أكبر الله أكبر ..

حسدوج ..

تو الناس ماما ..الناس تقرأ قبل العرس ..قبل الفلعة ..!!

مب عقب :(

تخيلوا من فندق البستان “المعفن” .. سيده حوادث ويلكير ..

بكشختي ..

بمكياجي ..

و أدش الحوادث و الكل شغال “تبحلق” ..

يا ربي ..

ما يستوي عروس تتخرطف و تنزف؟!

هم من شافوا الابيض ..

و شافوا ريال وياي ..

قالوا يا حرام عروس من أول ليلة في المستشفى ..

زين ابوي هذا بلاكم ..!!

و زحمة الحوادث ..

و ضرابة ..

و صوت يهز المستشفى هز من مغربية ..

طنشها مال الريسبشين ..

و خلا مواطن يدش قبلها..

يه يه يه ..

كيفه مواطن ..

:@

قلت حق ابوي ..بابا بابا ..

ما اتحمل ..خلاص

فديتني رقيقة مستوية ..من اشوف الدم .. أدوخ ..!!

قلت ودني الصيدلية ..

أي صيدلية ..!!

عاد يدقدق يشوف شو الصيدليات المناوبة ..

شفنا صيدلية في شارع الرقا ..

يا ربي شارع الرقا و يوم الخميس ..

لا لا مابي مابي ..

من القهر ..يلست اخرب تسريحتي و أطلع البلاوي اللي حاطينه في شعري ..

من نزلت ..

أشوف يمعة أولاد ..

لا لا ..

مابي فشيلة..

مب عرس ها ..!!

كان أتغشى ….!!

:S

ليش من أوصل باب الصيدلية ..

ادور فيني الدنيا و يسندني أبوي ..

و أيلس على الكرسي ..

يقولي راعي الصيدلية ..

أشوف ريلج أشوف ..؟!

شو مستوي ؟!

و أبوي يقولي كيف استوى ..؟

مليون مرة أخرط عليه و أقول كنت أمشي و مسمار دش ..

يقول فاصخه نعالج كنتي؟

أونة عرس و فاصخة نعالج ..؟!

قلت بعد ربك من فوق هالله هالله و من تحت يعلم الله ..!

و أنا بصوت خفيف أقوله بابا ..

أٌقول يعني سايرة فوق أرقص ..؟!

و دش المسمار ..

“أحسن عسب أتأدب مرة ثانية و أقر في مكاني” ..!!

أوني أسوي جو حق العرس ..

خو ولد خالي ..و تمون حصوووه أخته خخخخخخ …!!

حتى أبوي من الصدمة يقول ..

من هاي الحمارة اللي حسدت جمالج ؟!

لا عاد كبيرة .. هاي الغيرة ..!!

:P

عاد من رفعت شوي من طرف فستاني ..

أبوي يقولي نزلي عاد لا اطلعين “كراعينج” ..

:P

يه يه يه يه

مصابة شو أسوي ..!!

:S

ضربني أبره ..وااااااي ما أحب الابر ..!!

و عطاني دواء ضد التسمم من المسمار ..

و حط مطهر ..

و لفها بالشاش ..

و قال هو يحتاي خياطة ..بس لو نزفتي بعد أيام سيري المستشفى ..!

خوش والله ..

كان أرد البيت ..!

عاد عقب استوعب أني يوم طلعت من القاعة ..

و صوب اللوبي ..

كانوا الريايل ..

و نحن من صوب المعرس .. كانوا الريايل من الاهل ويا ربعهم ..

عاد هم يوم انتشر خبر اصابتي ..

الكل عرف ..

اللي يعزي .. و اللي يندب الحال.. و اللي دمعة على خده

و الاتصالات مستمرة ..

و المسجات من صوب ثاني ..

هذا مسمار و جي ..

و ين لو لغم ؟!

:P

لكن شيء واحد لين ألحين ودي أعرف.. منو ها ..

سوالي آد في المسنجر اليوم الثاني ..

و كتب سلامات ..سلامات ..

بس حبيت أتحمدلج بالسلامة ..

و أقوله من أنت؟

ما يقول ..

قلت زين ..كان أرقده في البلوك دليت ..

و ما خليت حد ما قلته ايميل من ها؟

حتى امن الدولة ما عرفوا ..!

هي عاد لو حد من الأهل يقرأ بوستي ..

هي شوفوا ربعكم ..شوفوا هذا الشليتي..

يمكن واحد منهم ..عن الحركات ..

مسنجر ما يوكل عيش ..

حياك بيتنا . . الناس ما تنقز سيدة من الدريشة ادش الباب..

سوالف عاد ..لا ينط عرجكم بس ..!!

: :

اشوفون الدراما اللي فوق كل ها تذكرته

بس من شفت هاي الصورة : ( !!

و هاي الصورة يوم طرشتلي حصووه الباقة ..

واااااااااااااااااااااي لو اتيبون لي حديقة هايد بارك ..

ما أنسى الألم ..!

: (

عـــــــاد أقولكم .. الزبدة “ألحين الزبدة عاد” ..

اعتزلت الفن ..

خلاص ..

 

ما أبى لا “يمه ضربتني عقربة” .. 

و لا “حسين الجسمي” ..!!

@:

ترى اليوم أعلن اعتزالي ..

و الحمدلله محد بيذلني و يقول عرس أختج و عرس أخوج رقصنا ..

لأن لين ألحين محد عرس من بيتنا ..!!

و محد رقص في عرسنا ..

ف

عن الخرط ..

و عن اللواته ..

و محد يحثني على الفساد في الاعراس الياية ..

ترى اللي ما عرف .. خبروه و لا خبروها ..!!

و اللي رقصت في عرسه و لا عرسها

الحساب فين؟!

LOOOOL

أقصد تردونه في عرسي و لا عرس حد من بيتنا ..!!

هي مافي شيء يمر مرور الكرام ..!!

و سلامتكم