وصلنا مدينة جدة تقريبا في الساعة السابعة و النصف مساء بتوقيت السعودية .. بديت ” أسطل” قلت في خاطري كيف بعتمر و أنا جي ..حتى مفعول “الريد بل” ما نفع يوم شربته في مطار دبي ..كنا حوالي 23 شخص ..لأول مرة نسافر بهالعدد .. كلهم رباعة ماما و عيالهم ..من صوبنا نحن كنا فقط 4 ..أنا و ماما و خواتي ..

طبعا يبيلنا تقريبا ساعة لين نوصل “مكة” ..طول الدرب كنت سرحانة أشوف شوارعهم و أي شيء يمر في دربنا ..أقدر أقول بأن السعودية تغيرت وايد .. كثرت قاعات الافراح عندهم خخخخ ..كل خطوتين قاعة افراح و مناسبات ..على فكرة شيء حلو ..نحن نعاني في موسم الاعراس في الحجز بالرغم من كثرة الفنادق ..بس سبحان الله الناس ما تسوي أعراسها الا في قاعات معينة في الفنادق ..

مب هذا المهم ..مثل ما قلت طول الدرب كنت سرحانة ..أفكر شو بدعي أول ما اشوف الكعبة ..ادري بشوفها من الفندق ..قبل لا ادش الحرم ..قلت الا يوم اشوف السواد ..على طول أدعي ..هو اللي اعرفه ان الزيارة الاولى تكون الدعوات الثلاث مستجابة ..بس لأن انا زيارتي كانت الرابعة ..ف مادري اذا هم بتكون مستجابة ..بس ان شاء الله بتكون..

وصلنا تقريبا الساعة التاسعة و النصف .. سبحان الله يوم وصلنا الشارع اللي يكون على مرتفع من الجبل ..اذكرت زيارتي الاولى لبيت الله ..و كأنه بالامس و ليس من سنين طويلة..لو تمت مكة على حلتها الجديمة كانت أحلى و أحلى ..على الاقل بتحس بزمن الرسول “ص” .. 

كنا حاجزين في فندق “زمزم” اليديد ..ماشاء الله اللي يشتغلون فيه كلهم سعوديين ..حتى اللي يوقف عند الليفت ..واللي يشل الشنط بعد ..شيء طيب الصراحة ..كانت العملية سريعة  ولله الحمد ..عسب حجزنا ما كان ويا الحملة ..البقية يعانون في توزيع الغرف خخخخ يقولي اللي عطيته الجواز ..ما في مدرسة أجل خلصتوا؟ …قلت مدرسة ..الله يهداك أشتغل أنا ..عق نظارته من الصدمة ..!!

أول ما وصلت الغرفة ..طوالي عند الدريشة ..أدري بابا حاجز على الحرم ..قبل لا افتح الستارة ..اقول يا الله ان شاء الله عيني اطيح سيدة على الكعبة ..من بطلتها كان اشوف الحرم ..غرت عيني ..و دعيت الثلاث الدعوات بلا تردد حتى حسيت ان لساني جي مبرمج خخخخ

حطينا الاغراض ..و الكل تيمع ..و نوينا نعتمر ..وصلنا الحرم ما كان بذاك الزحمة حزتها ..طار الرقاد في الطواف .. حتى ما حسيت فيه ..طبعا كنت طابعة أوراق لخطوات العمرة و الادعية ..يعني مضبطة أموري ..و ما تصدقون انها بس كانت كبسة لمدة 5 دقائق في عالم النت ..و حصلت كل اللي ابغيه و لا طبعت حق الاهل بعد..يعني أجرهم علي..”داهية في كل شيء” ..

كانت السفرة سريعة ..حتى العمرة كانت سريعة و الحمدلله ..ما حسيت بتعب وقت تأدية مناسكها لكن التعب كان قريب صلاة الفير ..

المهم خلصنا من الطواف ..انتقلنا للسعي ..كان شوي زحمة  ..تقريبا خذينا ساعتين لين ما انتهينا من الطواف و السعي ..عقب قصوا كم خصلة من الشعر ..

المهم عقب يلسنا في الحرم نصلي و ندعي لين آذان الفير ..عانيت من النعاس .. و في الحر اسطل اكثر.. عيوني على الساعة و في خاطري اقول متى يأذن يا الله خلاص بموت .. و كل ما ابى ايود اقرأ القرآن مخي يقفل .. لين ما سمعت “الله أكبر” و أفز من مكاني .كنت بعيدة عن أهلي .. يالسة وراء بين سعودية و ايرانية ..الايرانية قطعت عني الكهرباء و الماء..يعني والله في ناس مادري كيف اوصفهم ..يعني يشوفون مكان ضيق ايون و يحطون كرسي و لا يلسون ..زين قلنا يخافون يدش الشيطان بينا ..لكن مب لهالدرجة ..الواحد يحس بنصخ الثاني ..والله متمالكة نفسي حدي مول..لين ما يت وحدة بحرينية قالت سوولي مكان ..كان أباغم وين انسوي يعني ؟ .. قالت بيت الله و ما في مكان .. قلت أكيد بيت الله ..بس عاد بمنطق وين بتيلسين ..على ريلي؟ ..المشكلة ايون وقت الصلاة و يبون مكان ..!!

 صلينا الفير .. كان انشل بعمارنا و طوالي على السرير ..قمت قبل صلاة الجمعة بشوي ..الاهل و الربع كانوا مجدمين  .. كان أيلس روحي في المسيد ..المشكلة انه يوم ايلس روحي تستوي طامة كبرى ..

نفس مآساة البارحة ..أقام الصلاة المؤذن .. وقفنا ..أصلا المكان مثلث ..لأنه على طرف المسيد ..فبالعقل الوقفة ما بتكون متساوية ..ما علينا وقفنا ..كان اشوف وحدة ادش في الخط و ازاعج علي وقفي في الخط ما يستوي جي ..كان اشوفها قلت ليش ازاعجين انزين ..رمستها بالاول حسيت انها “زلمة”  ..لكن يوم نصلي الركعة الاولى خربت صلاتي بحركة سوتها لي و ما كان لها داعي .. حتى صلاتي ما خشعت فيها ..قلت ماعليه خلنا نخلص و أنا اراويج ..

  من سلمنا كان التفت لها ..و دار حوار ساخن بينا .. يا عالم شو هالتخلف .. شو هالتفكير “الساذج” ..كل واحد صار يتفرد بفكره في الدين .. هذا اللي ينصح و هذا اللي يفتي ..و هذا اللي يلصق بكل شيء يسويه على اساس ان الرسول كان يسويه .. أنا أكره شيء عندي حد يتلفسف في الدين و هو حاله من حالي .. يعني هذه الاخت الكويتية كانت صابغة ويهة مكياج و القلوس والله ما اقص عليكم جي احمر على وردي .. و حافة حياتها حف اليهد .. هذا شو تسميه؟ .. مقيولة “بقرة ما اشوف ذيلها” ..تنصحني في شيء و هي مسوية سواد ويه في بيت الله .. أنا من الاساس ما كان ودي أرد عليها ..و لكن قهر تضيع صلاتك على ناس تافهة..

لو مثلا غلط في شيء ..خلي الصلاة تنتهي و بيني وجهة نظرج .. عسب الناس ترد عليج باحترام ..لكن هايل قوم طينة “تجميع الحسنات بالدز” ..لا و تقولي الله يهديج ..قلت الله يهديج انتي ..الله هادني و لله الحمد ..بس انتي غسلي ويهج أول .. !!

كان تعصب ..و تشل نقابها هذا اللي بو ربع طوله اللي مول يجذب الريايل أكثر ..يعني هاي الطريقة من النقاب مب حرام؟!

استغفر الله ..هايل اللي يخربون عمرتنا ..

كان أنش و اسير المطعم لأن أهلي هناك ..و تتيمع الشلة كلها ..و يقررون ان يسيرون السوق بعد صلاة المغرب و العشاء..عاد حريم تلموا تعال اتسمع سوالفهم ..

عقب الصلاتين الحمدلله ما استوت مناقشات و لا تكفيخ لأني يالسة عند أمي ..خخخخ .. صلينا المغرب على طرف من الصفا و المروة ماشاء الله كان زحمة المكان ..و من خلصنا تقدمنا للمسيد نتريا صلاة العشاء ..كان هالوقت جدا روحاني ..قريب الكعبة ..و كأنك تناجي و تصلي و الله يسمعك و يشوفك ..حزتها ذكرت “يدتي”  :( .. أتذكر يوم ايبون لها زمزم ..كانت تشربنا كلنا ..ان شاء الله لو رشفة .. الله يرحمها

 صلينا العشاء ..و سرنا السوق ..عاد أقولكم فندق زمزم شرى المول مسوينه ..تخيلوا شيء محلات ألدو , لاسنزا , كليرز, بي اتش اس, نعومي, مذكركير, مكياجي, الماركات شانيل و ديور, توب شوب, دبنهامز, أكسسيريز, و أخيرا ستار بكس ..هايل اللي أذكرهم ..مع احترامي يعني للعقلية هايل كلهم ايون تحت بند “الحرام” كما قيل و لازل يقال..كيف فتحوهم في الحرم؟ ..يوم شفت هالمحلات كلها ..قلت “الله الله على الدين” ..وين المقاطعة ..وين الشسمه ..عن نفسي أتشرى لكن اللي كانوا يقولون حرام و حرام ..كيف رضوا يبطلون هالمحلات في هالمكان..؟ و يلسون يسون لنا جمعية اصلاح..لبسج كلبس الغرب ..و لا للبناطلين و عارضين آخر صيحات الموضة ..عيني عينك ..

لا تقولون الوكيل مسلم و لا الدخل يكون لسعودية فقط.. تراها صناعة أمريكية بريطانية ..حتى الاسعار موجودة ..ما علينا أنا ما اتهجم على السعودية ..و لكن لأشخاص معينين اللي من طينة أم نقاب بو ربع ..

قلنا هالمول يبيله باجر نلف فيه .. خلونا انسير الابراج أول شيء ..لفينا فيه خذينا مصابيح حلوة .. و حتى سرنا الليلام اللي برع ..يا الله أطفال بدون يد ..مناظر تقطع القلب ..أرمس وحدة منهم أقول وين ماما عنج أنتي ..تقولي ماما في جدة ..قلت و أنتي شو اسوين هنا ..أنا مع أخوي الصغير ..والله كانت تشحت ..و الوقت متأخر ..

بالرغم من تطور مكة ..الا ان فيها ريحة و وجوه من الناس و طريقتها في الكلام و اللبس اذكرك بالماضي ..أغلبهم سمر من أشوفهم أمي تقول هايل من سلالة بلال الحبشي ..عاد مادري صدق معلومتها و لا لا ..

خلصنا التسوق ..رديت أنا و أختي الفندق ..و أمي ردت الحرم كانت ناوية تختم القرآن في السعودية ..أنا الصراحة مال تعب يومين عطيتها خمدة متقطعة لين الصبح ..للأسف صليت صلاة الفير في الفندق ..بس بحسبة جماعة خخخخخ.. حاطين سماعات في الغرف ..كل شيء ينسمع ..!!

نشيت “فريش” أنا و اختي الصبح ..قلنا بنلف في المول أعتقد اسمه بن بطوطة .. شرات اللي عدنا في دبي ..طبعا الاسم فقط ..كان ابديلكم من الدور الارضي لين الدور الرابع ..ما خلينا شيء في خاطرنا ..

لكن المسرحية الحلوة اللي صارت ان القروب تفرع ..البعض منه ما سمع لتحذيرات المس نجاة “هاي ربيعة ماما و هي المشرفة على القروب” ان في الساعة الفلانية لازم الكل في اللوبي عسب انسير المطار ..المفروض نطلع بدري ..لكن نحن 6 المغرب طالعين ..و يطيح البوكس ..

و نسابق الزمن حتى نوصل المطار ..وصلنا بس كان الوصول جدا سيء ..الكل متنرفز ..و أولهم أنا ..كنت تعبانة فسيولوجيا ..حدي واصلة و احاتي باجر الدوام ..أقول في خاطري متى برد و متى برقد ..و شوي اقول لا لا ما بداوم ..

المهم ياية اشل شنطتي و اخليها في المكينة هاي اللي يجيكون الشنط فيها ..كان يدزني شرطي و يقول “شوي شوي” ..عاد أقولكم كرهت الحركة و الاسلوب ..يعني وين الاحترام ؟ ..ناس ضيوف و جي المعاملة ..شو خدم نحن ؟ ..

و أنا أمشي بسير عند الشرطية عسب تجيك علينا ..تم يطالعني الشرطي ..أنا من الغصة قلت ..”خوش ريال بدال ما يشل الشنطة يدز و يقول شوي شوي” ..و كنت معصبة ..لأن صدق شرطي ما فيه أدب مول ..

 و أنا طالعة من غرفة التفتيش و ياية اشل شنطتي ..وراي كان ولد الخالة نجاة ..المهم ياه الشرطي و تم يقول “وش بك يا شيخة؟ ..وش بك يا حجة؟ ..قلت في خاطري حجة في عينك ..أونة علامك محرجة ..” ..عاد أنا سكت و هو لأنه انقهر جدام ربعة أني مطنشتنه ..تم يزيد و يعيد ..كان أطالع بويهة ..وقلت ببساطة “ممكن تسكت؟” ..هو انا زين قلت تسكت ما قلت “تنطب ,, تنجب” ..خخخخخ

 و كان أمشي ..الشرطي عسب يغدي ريال ..سحب جواز “خالد” الا هو ولد الخالة ..أنا هنا ما كنت أدري ..اجدمت عند الربع أشوف اختي الكبيرة ما يت ..كان ارد مرة ثانية ..اشوفها تزقرني ..تقول شو قلتي حق الشرطي؟ ..قلت هذا يدز بشنطتي .. و كنت مفولة مرة ..قالت تعالي تعالي ..

يوم سرت أشوف شرطي كبير في السن ..بعد مسوي عمره ريال ..و يزاعج ..الا اكتب فيهم محضر ..و بيده جواز خالد ..

كان أزاعج عليه و قلت له القصة ..و تقوله اختي استح على ويهك ترمس بنات و صوتك جي ..كان يقفط ..و يسكت .. و يجي واحد أكبر عنهم ..بس أصغر في السن ..قال شو السالفة ..و أقوله القصة ..حتى من كثر ما هو محترم ما يشوف في الويه ..الله صدق خلق و فرق ..

 عطاني جواز خالد ..و قال خلاص حصل خير ..سيروا ..كان أقول حق صاحبنا محضر ها ..سو محضر ..و الشرطي “بو الدز”  ..يقولي احترمي المكان مرة ثانية ..كان أرد عليه محترمة نفسي قبل لا احترم المكان الباقي عليك ..!!

 سيدة اذكرت تعامل الشرطة عندنا .. يا زين التعامل ..والله باحترام يعرفون كيف يتعاملون مع البنات ..حتى لو البنت غلطانة في شيء ..باسلوب محترم يوجهون ..!

و لا خل الاخوان ايون الامارات ..والله “نستحي” جي نعامل الضيوف ..لكن ماعليه واحد ما يتعمم ..مع أن هذا الواحد في مركز حساس ..مش مواطن عادي ..لكن صدق ما فيه أدب!

ركبنا الطيارة ..و تأخرت علينا ..وصلنا البلاد تقريبا الساعة 2 الفير ..

بابا كان في الاستقبال عند باب الطيارة ..كان يقولي “بلاه ويهج مصفر” ..قلت “مزاعجة” وايد خخخخخ ..

ودعنا الربع و الشلة ..و الصراحة كانت السفرة مرة حلوة .. “قمت أرمس سعودي” .. تمنينا اتكون الفترة أطول ..و لكن ما باليد حيلة ..!!

طبعا اليوم اللي عقبه ما داومت .. :) !!

الايرانية اللي قطعت عني الكهرباء و الماء .. اتعاديت منها على فكرة ..فيني “كحة” و حمة خفيفة الحين ..!!

تراني من النوع اللي ما عنده مناعه ..سيدة يلقط أمراض خخخخخ ..

لازم المرة الياية ..”يطعموني” ..و يضربون ابرة في لساني ..عسب ما أضارب ..!!

هو أنا مادري كل عمرة جي ..لازم فيها فلاسفة ..سبحان الله ..!!

::

::

::

::

 

 

Advertisements