من كان عمري 15 سنة .. يعني في أول ثانوي .. صح كانوا ربعي من سني .. و قراب مني ..بس بعد كنت مرابعة ناس في العشرينيات و الثلاثينيات و ما فوق حتى حزتها..

كنت أستغرب يوم أسمع من ناس .. أنهم من الصعب يرابعون ناس يفوقون في العمر عنهم بأميال و أمتار كبيرة .. و يشوفون انه بينهم و بين هالناس حدود و يمكن الكبار ما يعطونهم ويه ..أو حتى عيب يطلعون وياهم مثلا السينما ..”شو نشادين يطلعون ويا قوم يهالو؟”

مع أن اللي يقول هاي الرمسة عمره 26 ..يعني بالنسبة لواحد في الثلاثين يرابعه عادي ..بس ليش البعض يتحرى ان الارتباط أو العلاقة أو الصداقة بين شخصين يتحدد بالسن؟!

أنا صدقوني مب من اختياري كان و لكن القدر حتم علي .. بذكر شخصية هنا من اللي رابعتهم من فئة “العيايز” بالنسبة لي خخخخ .. و شو استفدت منهم و شو المواقف اللي كانت تضحك صادفتني وياهم و كيف أصبحوا و كيف أصبحنا ..و كيف وصلنا ..!!

هي ” زوجة العيناوي” ..بنت خالتي .. أم عبود .. قبل لا تكون طبعا أم عبود .. كانت الاخت بعيدة تماما عن العائلة الكريمة ..بحكم أنها كانت تدرس في جامعة العين .. و مب كل اللي في العايلة بتحصله يزورك و لا تشوفه .. الاخت هاي كانت قاطعة صلة الرحم مع احترامي الشديد لها .. صح “ربتني” خخخ يوم كنت طفلة ..لأن أنا و أختي كنا نسير دوم مردف عندهم ..لكن يوم كبرنا و كبرت الاخت انقطعت العلاقات بتاتا ..

و فجأة و بدون مقدمات شفتها من بعد فترة طويلة .. ياية بيت يدتي الله يرحمها ..حزتها كانت الاخت اداوم ..شفتها داشة الاخت و حاطة “كليبس” على قصتها ..أقول في خاطري بلاها هاي ..مصدقة عمرها ياهل خخخخخ ..و كانت ترمس باسلوب اللي ما يعرفها يتحرى انها خقاقة ..!!

شوي شوي كثرت جياتها ..و شوي شوي توطدت علاقتنا ببعض ..أولها يسود الاحترام للعلاقة الاخوية..لكن شوي شوي “طاحت الميانة بينا” على قولة الكويتيين ..!!

كانت كل اسبوع ادق علي قومي نطلع .. ما خلينا مكان ما سرناه .. ما خلينا بقعة ما ثبتنا وجودنا فيها ..خخخخخخ .. كانت على أيام عنفوانها الشبابي قبل لا تعرس ..عندها كامري أخضر .. “ألحين بتصفعني لو قرت” ..المهم كنا على أيام مهرجان التسوق ..و سايرات شارع الرقا ..أعتقد نبى نطلب من Subway..و الجو كان رهيب مب حر .. منزلة الجامة هي .. تدرون عاد شارع الرقا .. شيء شباب ايونكم على الدراجات ..واحد يقولها بصوت خفيف ..كامري عاد ..كامري و فاتحة الجامة و شارع الرقا ..خخخخخ ..!!

ليش ما انزل راسي و أنقع من الضحك عليها ..أقولها صدق والله يايبتنا شارع الرقا و لا بكل فخر منزلة الجامة ..رفعيها يا ويهج .. زين بعد سيارتج مخفية ..!!

و على فكرة ما كانت تحب التونا مالت Subway..و لاني من عشاق التونا ..خليتها غصب تحبه ..عقب تمت تسحبني دوم عسب أكل وياها..!!

شوي .. و يتقدملها واحد عيناوي ..عاد كانت صدمة ..كيف “بتنجلع” أقصد بتسير العين و تودرنا ..طبعا طاف حقنا ..هذا يسمونه ريل ..ان شاء الله لو المريخ بيركضن البنات وراه ..

 صدق من دبي للعين ..فرق شاسع .. بس فرحت لها .. و تصدقون شاركتها في زهابها .. كل يوم يارتني من مكان لين مكان ..حتى استويت خبرة في كل شيء ..خخخخخ .. عنبو حتى دخلتنا المكتبات عسب تشتري كتب الطبخ ..يا ربي الريل جي يسوي في الحرمة؟!

أذكر يوم سايرين ندورلها لبس حق الخطوبة ..الحبيبة مقررة تلبس لون أحمر ..وهقت العيناوي وهقة خخخخخخ ..يعني يخسي يقول ما أباها و لا بفصخ خطوبتي .. و أحيد يوم أساعدها في لبس فستان “ملجتها” ..عنبو ما تخيل .. حتى والله أذكر كنت واقفة فوق السرير ..عسب تدرون طولها ضارب كان بالنسبة لسني ..!!

طبعا ما يستوي ما ارمس عن جولاتها و صولاتها في عالم النت ..كنا نسهر لين الفير .. نسوي مشاكل في النت و نطلع ..لين ما الله بلاها بهاكرز .. خخخخخخ ..و كانت بريئة عادي عادي يقولون شو اسمج ؟ ..بتسطر لهم اسمها ..يا عمي الا هو هاكر ..بلاج !!

و عرست الاخت ..و صففت لها عبود و عمور و علاوي ..و تجاهد عسب البنت ..بس شكلها بتصفف عيناوية بس ..محتايين لعيبة نادي العين هالايام ..خخخخخخ

عموما .. منها استفدت كثيرا حق حياتي المستقبلية ..”مرابعة مصلحة يعني” أي سؤال ألقى الاجابة عندها .. بطريقة جدا واعية و ذربة و أحيانا غبية ..يعني لو انا كارهة الشيء هذا ..بتحببني فيه .. صدق يوم أنها درست علم النفس كانت قد هالشيء .. بس تقهرني أحيانا يوم تقول كبرتي والله  ..و لا يوم يكون مصادف عيد ميلادي ..تقول وي 22 بعدج ياهل ..والله ياهل أحسن من عيوز يا أم الثلاثين  ..!

يعني باختصار رابعوا هالاعمار ..أغلاطهم بالنسبة لكم استفادة لحياتكم المستقبلية ..!!

ألحين واعدتنها بطلعة بالسيارة اليديدة ..عاد أعوض أيامها أيام الكامري بسيارة على مستوى ..مسكينة تقولي خلينا نخق ..صدق مول مب طايح عليج يا أم عبود و عمور و علاوي ..و هاي نغزة انج خلاص ودعتي أيام العنفوان ..اصحي يا ماما اصحي ..!!

و أشياء ثانية ما ادانيها ..يوم تطري الزواج تقولي ..الصراحة انتوا اللي ايونكم لازم يفكرون مليون مرة .. تتحرى بنكسر ظهر الريال بالمهر ..عن نفسي بكسر ظهره بس بشيء معقول يعني ..أكل القطاوة و الكلاب الله يعزكم زادوه ..ما تبون المهر يزيد بعد ..أسولف أهم شيء الاخلاق نشتري ريال نحن “بشششششششششششششششششش” ..!!

Advertisements