مكتوب علية الشقاء .. مب عين صاكتني صكة ..
 ما أنلام ..جمال على أخلاق على أناقة على دلع..
على خفة دم و روح..
 و عقل كبير “مداح نفسه يباله دعمة مب رفسة” ..
بس والله الحالة ذي على قولة “القطريين”
 مب طبيعية كلش اشدعوه اشارة حمراء و ما يشوف الأخو؟!
وكالة الطاير تعبوا و هم يعدلون هاي الجهة من السيارة ..
 هذا ثاني حادث أسويه و كله في نفس المكان..
أول حادث كان على شارع الشيخ زايد ..
و ثاني حادث و اللي هو البارحة على شارع المطار ..
كنت واقفة على التقاطع ..و الاشارة حمراء ..
كانت عيوني اشوف في المنظرة ..سبحانك مع أني ما ابحلق وايد يوم أسوق ..
 شفت لكم “باجيرو” طاير طيران ..قلت في خاطري
يا بابا حمراء الاشارة ..خف عن تشلنا ..!!
شوي ..و طااااااااااااااااااااااااااااااااااااااااخ ..بسيارتي ..
كان أهتز و أقول “خيبة” سواها الملعون ..!!
و أقول ..
La Plz not again
زين أني ما كنت لاصقة بالموتر اللي جدامي ..
مسوية مسافة ..و لا  كان ضربته .. !!
المشكلة انه “هندي قاهرني” قبل لا تضوي الحمراء و كانت خضراء ..
الحبيب موقف ..
يعني لو كان طايف كنت معدية هالتقاطع. .
لكن سبب أني أترياه ..و تلبق الحمراء ..
و ايني هاك مسرع ..!!
شبت خضراء الاشارة ..
 الملعون الاول سار ..يا ليت بس لو كنت موقفتنه ..
كف على ويهة و بقوله سير يالله ..!!
كان ابطل باب السيارة ..
 و اشوف اللي عندي منزل الجامة يقولي هاردلك شيء ضربة ..
يتلي صيحة “ما كنت مصلية لا المغرب و لا العشاء”
 لأن كانت عندي فعالية بيحضرها الشيخ و مستانسة برد البيت بدري ..
كان أقول يا ويله لو طلع هندي ..
الا اشوفه مرتز في السيارة .. و كان شاب مواطن ..
أقوله بالاشارات دعمتني؟
أبى أتأكد ..حرك راسه بطريقة جي “دلوعية”  و ملامح ويهة اختفت
كان ينزل .. و أطالع سيارتي ..
قلت
Shiiiiiiiiiiiiiiiiiiiiiiit
نفس المكان لا حول ..اشارة حمراء ما اشوف؟ ..
يقولي ليش مسوية قبل حادث ..
قلت هي نفس المكان ..
لا حول ..
قال آسف اختي و الله مب منتبه ..
قلت زين يالله اتصل بالشرطة..
بتتصل و لا اتصل؟
قال لا بتصل ..
مادري ليش حسيت انه “نذيل” كان مب نذل ..نذيل
أنا سكت لانه مواطن..
شو اسوي ..
ولد بلادي ما يهون علية ..
بس لاحظت عليه أنه خايف مادري ليش ..
ركبت السيارة ..و ضربنا 4 اشاير
و نتريا و نتريا و نتريا ..
قريبين من القيادة ..ما يحتاج كل هالتأخير
كان ايني و يدق الجامة ..
كان ارتبش ..اف ما احب هاي الحركة “كلش”
قال “الغـــــــــــــــــالية” لاحظوا مب أختي ..
الغـــــــــــــــــــالية ..حركات عسب أسامحه ..!!
قلت نعم؟
قال خلينا نعدي الاشارة و نوقف على الينب ..
قلت زين ..
وقفنا ..ياني بعد ..قال ترى أنا ما عندي ليسن
شو بسوي؟!
قلت حلو حلو حلو ..هاي مب مشكلتي ..”هنا عصبت”
قلت تدري مب مصلية  المغرب و لا العشاء ..
لو مت ها؟!
قال والله سوري ..اتصلت ايبون ليسن اخوي التوأم ..
قلت يعني ما اتصلت في الشرطة ؟!
حسيت انه متصل في ربعه قبل لا يتصل في الشرطة..
لا اراديا دقيت على الشرطة “خبرة خلاص” ..
الشرطة؟ مسوين حادث عند التيرمنل الفلاني ..مسوين بلاغ من قبل
نص ساعة ..وينكم؟
قالي برقم منو؟
واعطيه تيلفوني حق اللي داعمني ..
الاخو يطالع تيلفوني ..عايبنه الشكل ..أقوله رمس الشرطة ..
كان يختبص وحليله ..
و كان يتصل بعد ابوي في الشرطة ..و في نفس الوقت يت الدورية  يوم ابوي شرف..”يلعن ابو الواسطة”
المهم شاف الشرطي ..
و طبعا هو الغلطان ..
والله ستر على الولد نفس الوقت ربعه يابوله ليسان اخوه..
طبعا لازم يتأدب ..بس شو نسوي..
حرام أمه اصيح عليه ..
همست لأبوي و قلت ما عنده ليسن ..
و قالي خلاص سيري أنتي البيت ..
وأنا بركنت في البيت ..
أشوف الموتر من وراء ..
واعلية عليج يا الغالية ..ما ودي حد يخدشج ..
و لا ودي حد يخرب ملامح ظهرج ..
بس شيء “قتلة محتملون” في الشوارع ..
مادري مخهم وين؟!
آسفة يا سيدتي الجميلة ..
أدري أستاهل ..لاني أرفضج و أبى سيارة ثانية و ثالثة غير ..
لأنج مال أول استويتي في نظري ..
حبيبتي يا الرنج ..سامحيني ..!
أوعدج وعد بناتي .. ان اليديد مكانه في آخر القلب ..
و أنتي الجديمة في سويداء القلب ..!
الشهقة الاخيرة
أنقهر يوم حد يمر و ينزل الجامة ..و يقول شو تبين مساعدة أختي ؟!
انزين ضاربين 4 اشاير ..اذا مب حادث يمكن نتريا حد ..!!
شهمين زيادة عن اللزوم..
ولي  ينزل الجامة و يقول يا الله حادث لا اله الا الله  و يسير ..
“يتلي ضحكة والله من هالموقف”!!
مع أني كنت متنرفزة و مودي طاقع هالاسبوع ..!!
بس الحمدلله على كل حال : ) !!

Advertisements