سبتمبر 2007


 

 شوفوا الله يسلمكم .. كنت أحب أشوف “نعم و لا” ,, و وقته وايد مناسبني ..! 
على قناة قطر .. و بعد الفطور .. بس الله يسامحهم اكتفوا بالاعادة و الساعة 2 ليلا ..
 من يوم ما غيروا .. ما قمت أشوفه ..
البارحة بالغلط حطيت بوظبي الساعة 11 .. أثرى ينقلون هالوقت ..! 
شو ما استانست ..بس بعد شو؟
بعد ما كبروا .. و اطلقوا .. و ماتوا ..و أنا أطرش في الزفة ..
 المسلسل جدا جدا جدا عجيب .. 
 و له هدف معين .. 
 : ) 
 عطيت حق المسلسل الاول في رمضان ..
 و براويكم ألحين جدولي اليومي .. 
الساعة 2 الظهر أشوف محاضرة دينية .. 
الساعة 4 أشوف المسلسل السخيف “عيون من زجاج” على قناة LBC 
طبعا أشوفه من الملل .. 
و شوي أفر و أشوف الاسخف مسلسل لحظة ضعف حق زينب العسكري ..! 
بعدين يجي الجد ..
 أحط سما دبي و أشوف المسلسل الفلته الصراحة “وجه آخر” .. 
وايد حلو و فنان ..! 
و استانسنا حق خالد آمين .. ليش أنه بدأ يشتغل برع الكويت .. 
و بالتحديد في بلادي 
: ) 
عقب يجي وقت الفطور .. 
و يكون التلفزيون شغال على “المقاريد” ..
يضحك ..
 من يخلص ..
 أفر على “الفريج” .. 
تنتهي المشاهدة عندي ..
So
نتيمع ويا الأهل .. 
و شوي عقب نشوف “وحيد” ..
بس عسب أضحك على انتصار الشراح .. 
لين ما يبدأ “أزهار مريم” .. 
حلو و في نفس الوقت مب حلو ..! 
بعدين نصكر التلفزيون .. و نرقد .. لو مب دوام كان واصلنا .. 
: D
 صدق صدق صدق طلعت قيمة التلفزيون ..! 
LOOL
 \\  
// 
 \\
      قبل لا أختم .. في قلبي كلمتين بس ..
 
 أبدأها ويا خالد أمين ..!
 يعجبني هالممثل .. أحس به ثقيل .. 
و يختار النصوص اللي صدق تناسبه ..! 
صح هالرمضان لاعت جبده من دموع و “مخاط” فاطمة عبد الرحيم .. 
LOOL 
بس اخلاصه كان حلو !  
على طاري فاطمة عبد الرحيم .. والله كانت حلوة قبل .. !
 مادري ليش استخفت ؟! 
مسوية براطمها بشكل كريه يا ربي .. 
و مكياجها زفت ..
 و حياتها مرة فوق .. و مرة تحت .. و مرة مقلوبات ! 
 : S
 
ننتقل لالهام فضالة .. 
يا الله كيف ضعفت ..
ريجيم و لا شفط و لا ربط معدة .. مادري !
 يا زينها بشعرها الاصفر .. 
خو الذوق ببلاش هالايام .. 
حتى ملاك هاي اللي تمثل ويا حياة الفهد .. صابغه ..
Crazy Color
 حتى مب هايلايت ..
 بذمتها ..
ما شافت المنظره اول ما صبغت؟! 
زين أهلها ما قالوا لها Waaaaa3?!  
ننتقل لهيفاء حسين .. ” البحرينية الحلوة” ..!!
 صدق برافو عليها ضعفت و طلعت أحلى .. بس لين متى بتم عنقاش؟! 
صدق محد كامل !! 
اذا عندها حلا .. في اليد الثانية .. عنقاش للأسف !! 
و أدوراها كلها تفاني في تفاني .. ليش ما تغير؟!
 بس كله بصوب و “شيماء سبت” بصوب ..
 أحب تمثيل هاي البنت .. 
تبدع في المسلسلات الاماراتية .. على طاري الاماراتية ..
هاي “بدرية أحمد” .. أقسم بالله .. مصخره ! 
: )
  خيبة مب زند عليها .. مب شسمه .. 
مصدقة عمرها .. الوحيدة اللي متفصخة و بايعتنها .. 
خو قلنا طلعتي من الشارجة و افتكيتي ..
 بس عاد الساس يبقى لو اتشلحتي أكثر و أكثر ..
 بصراحة بصراحة عن تزعل بس .. وايد تخوف مستوية ..! 
ما سوت خير نانسي عجرم يوم اخترعت عمليات التجميل .. 
LOOL
  انتصار الشراح ..
 تهلك من الضحك .. 
 الحلو أنها تغير أدوراها من مسلسل للثاني .. 
 أما مروة خليل ..
 ف نقولها لا اسيرين عند ماكيير بدرية أحمد .. 
ترى مب شيء ..  
تخوفين بعد ..
 خلك رقيقة نفس العام .. 
: )
 اللي صدق حركاتهم عفوية و تضحك .. 
هو جاسم نغموش و عبد العزيز الجاسم.. 
و الله عمالقة في الكوميديا ..!  
و
هبة الدري احلوت ..
 وين قبل و وين ألحين ..
 الباقيات طبعا X 
نختمها و يا حليمة بولند .. 
 يعني عايبنها اللي تسويه؟!
 
تبون تشوفون عدل شفايفهما و ضروسها و عيونها ؟ 
شوفوا حلقتها عن أم كلثوم ..! 
الحلقة الوحيدة و الاخيرة اللي شفتها .. 
مينون من قال أنت اعلامية ناجحة ..!!
و مينون من يبى حرمته تكون شراتها ..!!
ألحين بس حسيت أن المكياج .. نعمة ..!!
اللهم أني صائمة “بعد شو عاد” خخخخ ..!!
: P  

 

من عقب ما خلصت الكورس على الساعة 12 تقريبا ..

قلت أحسن أسير “الغرير” أخذ عباتي .. و أتشرى كم غرض ..!

So

 كل ما أدش “حناين” أفصل ..

شو أسوي ينزلون أشياء تعيبني ..!

ألحين عباتين عنده .. لو سرت أشلهن ..

لازم بفصل بعد وحده ..

; )

 

و هكذا نستمر نستمر نستمر ..!

Anyways

يوم خلصت .. اشتهيت فراولة ..

حق السحور ..!

: $

قلت خلاص بسحر دوم فواكه عسب ما “أرجع” كل صبح ..!

عاد دقيت سلف بالموتر و سرت الجمعية ..

أنا حاطة في بالي كم فاكهة ..

بس خميت خم ..

 

و ترست “القاري” اللي يقول وحدة تتشرى حق بيتها ..!

و ماخذ فواكه جاهزه .. لا لازم أنا أحط في الاكياس ..

شوي عنب ..”عشان خاطر أخوي”..

شوي فراولة..

شوي همبة “عشان خاطر أمي” ..

شوي جزر من الصغار “عشان خاطر ميثوه” ..

شوي سنطرة ..

شوي تفاح هالقو .. اللي يسوي صوت يوم تاكلونه..

شوي كمثرى ..

شوي كيوي “عشان خاطر اللي قالوا نحب الكيوي” ..

شوي فواكه غريبة عسب أبوي يحبهم ..

و أنا بس داشة أشتري فراولة تصدقون؟!

::

 

 

و يلست في حجرتي أوني أبدع في ترتيبهم ..!

 D :

شو  رايكم أنتوا بس؟!

 كنت ناوية أفرفر ورود جوري بعد ..

بس ما حبيتهم يعشقون في رمضان ..!

خخخخخخخ

أحيانا تشبعون من النظر ..

ما يحتاي تلقمون شيء ..!

: )  

اللي يضحك أنه يوم سرت أحاسب ما عطيت الريال اللي يكون يالس عند الفواكه ..

و شغلته يشخط الكيس بالسعر ..

اللي وراي ريال عود .. يضحك علي !!

$:

 قلت حق اللي تحاسب ..

What to do 

That’s My First Time

 P :

صح صح .. و خذت بعد خوخ !

 أحب الخوخ والله !

: ) 

اقربوا؟!

و على قولة “شومبيه” .. “مقروبين”  خخخخخ …!

When I Will Be Fine, I Will Try to Cook it
  The Taste is so “Yumi” , I used to Order it from StarBucks & Abella
: )
Finally I Decided to Cook it
So Once it will be Perfect with Me, will Capture a Pic of it
 ; )

Here you Go

//

 

\\

 

//

شرائح الجلي 
200غ بسكويت  – 100غ زبدة
 1 ملعقة كبيرة جيلاتيننص كوب ماء ساخن
1 علبة حليب نستله المركّز المحلى – 1 ملعقة كبيرة عصير الليمون
100غ هلام (الأفضل أن يكون أحمر اللون)-450 مل ماء ساخن
450 مل ماء ساخن
كريمة نستله – كإضافةاختياري
مكسرات مقطعةكإضافةاختياري
الطريقه :
تحضير الطبقة الأولى  :
 
 يكسّر البسكويت ثم تذوب الزبدة وتخلط مع البسكويت المكسر
يضغط الخليط في كعب وعاء مستطيل الشكل. يثلّج لمدة 20 دقيقة.
 
 تحضير الطبقة الثانية :
يذوب الجيلاتين في 2/1 كوب من الماء الساخن. يضاف حليب نستله المركّز المحلى وعصير الليمون
يسكب المزيج فوق طبقة البسكويت ويبرد حتى يجمد الجيلاتين
 
تحضير الطبقة الثالث :
تذوب كريستالات الهلام في 450 مل من الماء الساخن، ثم يبرد ويسكب فوق الطبقة الثانية يثلّج حتى يجمد
يقطع. تضاف كريمة نستله والمكسرات المقطعة ويقدم الطبق! 
بالعافية عليكم ! 
عادي الأمر طبيعي عندي .. لازم كل شهر مرة أطيح..
بس في رمضان أول مرة ..صدق تعبت هالمرة .. الا كرهت عمري ..!
 من كم يوم أحس بصداع ..و جي لايعة جبدي ..
 و فية حمة داخلية و خارجية ..و بكسل فظيع ..
 و لا مشيت خطوتين ما أروم أوقف أكثر ..لازم أيلس ..! 
بما أن الاسبوعين اللي طافوا نزلت كم كيلو بارادتي ..
ف ما أعتقد النتائج قامت تبين ..لأن متعودة على سوالف الريجيم ..
 So من البارحة ..
و أمي هذا من الريجيم ..شوفي ويهج .. شوفي ايديج كيف استوت ..
شوفي جسمج .. والله سيلانيه .. LOOL  
كناية على أني “سلق” .. بس والله أنا مب سلق .. ! : @
 الله لا يراويكم كل فير .. من رمضان .. لازم أدش الحمام و “أرجع”
يوم الاحد في الدوام .. وحدة ترمسني .. أقولها صبري صبري ..و ركضة على الحمام ..! 
:  ( I’m Suffreing 
أخاف أكثر في الاكل .. و أتعب ..! 
حتى ما تسحر .. 
اليوم ناشة أسير الكورس .. ما رمت .. متكسره حدي ..! 
   مالي خلق أسير المستشفى ..
من البارحة أتعالج بالطب الشعبي .. 
ساعتين الحال تمام .. عقب ترد اللوعة .. !! 
عاد حد منكم مر باللي أمر فيه؟ ..
شو تاخذون ؟ 
Vitamins ?
 و لا شو بالظبط .. !!  
||  ||  || 
 كل ما بغيت أصيد شيماء علي .. تخون فيني ..!! 
LOOL
 كان أصورلكم خالتي قماشة .. 
على قناة عيمان .. صدق صدق يبالهم وايد لين يطورون ..!! 
رمضان و خالتي قماشة؟ صح مسلسل عجيب ..!!
 بس مب وقته ..!!  
   سؤال الحلقة .. من هاي الممثلة اللي احلوت في هالرمضان؟!  

   صاحبتنا لمعرفتها .. بحلقوا في الشاشة عدل ..!!

واللي يعرف هديته بتوصله : ) !! 

في الويكيند كنا في IKEA  .. كل ما نمشي انشوف حد من المشاهير ..
: P
اللي في فيستفيل سيتي ..!
واحد منهم كان المنشد “أسامة الصافي” ..!
أول مرة شفته يوم كنت صغيره في المدرسة ..
تراه خريج مدرسة الاتحاد الخاصة ..
 عاد أنا يالسة على الكرسي ..
و أطالعه و حرمته اطالعني ..
: P
و هو كان يدز “قاري” ولده ..
ابتسم و نزل راسه ..
يعني فهم اني عرفته .. و حرمته تبتسم ..!
لو وحدة ثانية كان صفعتني ….!
الصراحة صوته جميل ..
و أسمعله دوم ..!
الموال يضبطه عدل .. ما يحتاي ايقاع ..!
عاد أقولكم .. قبل شوي أدق على أمي ..
بالعادة ترد بسرعه ..
ما ردت يلست أسمع نشيدة حاطتنها من الاتصالات ..
لأول مرة أسمعها كاملة .. ف اندمجت و عجبتني الكلمات ..
و كيف ما تعجبني .. و المقصود فيها السيدة فاطمة : ) !
على طول دخلت Google
و أكتب المقطع الاول .. ما كنت عارفه من المنشد ..
المنشدين مادري أصواتهم تتغير بين الفينة و الاخرى ..!!
Anyways
كان يطلع المنشد الكويتي أحمد الهاجري..
 يا سلام عليه .. جد صوته شجي ..
فرحت يوم حصلت النشيد ..!
: )
من ألبوم “أدعوك” ..
||
||
||
||
للاستماع اضغط هنا
سيدا شباب الجنة
::
::
الكلمات هنا
سيدا شباب الجنة
سيدا شباب جنة الخلود الحسن ونور عيني الحسين
قسما حبي لكم بلا حدود و بقلبي الحب والله دفـــين
حفرت أسماؤكم فلن تزول حفرت بالقلب مذ أنا جنين
إنكم قدوة أصحاب العقول وبكم يفخر كل المسلمين
إنكم أحفاد سيدي الرسول هو شمس وإمام المتقين
حب خير الخلق بالنفس يجول
ولآل البيت نحن المخلصين
وعلي عنه ماذا سأقول
بحر علم وهو الماء المعين
نصله يعرف ما بين النصول
سيف حق داحر للمشركين
فارس شهم كريم ذو قبول
رابع للخلفاء الراشدين
هذه الزهراء هذه البتول فضلت على نساء العالمين
بنت هادينا وأم للعدول وهي زوج لأمير المؤمنين
أصلهم والله أشرف الأصول
وبهم يرفع دوما الجبين
::
أصوات أخرى أستمع اليها ..
ابراهيم السعيد
أحمد بو خاطر
سمير البشيري
فهد الكبيسي
مشاري العرادة
مشاري العفاسي
أحمد الجابري
: )
أنتوا تسمعون لمن؟!
مب تقولون شخبط شخابيط !!
LOOL

 

 

 

 ||

لو شفتوا الشوارع فاضية حزة المغرب .. عرفوا ان رمضان يانا ..!
لو شفتوا الخدامات من بيت لبيت و في أيديهن صحون و جدور ..عرفوا ان رمضان يانا ..!
لو شفتوا زحمة مب طبيعية كل مساء في الجمعية ..عرفوا ان رمضان يانا ..!
لو شفتوا أو سمعتوا “طاخ و طيخ صادر من الشلق” ..عرفوا ان رمضان يانا ..!
لو شفتوا خيم ناصبينها في كل بقعة .. عرفوا ان رمضان يانا ..!
لو شفتوا اليهال سهرانين في أيام الدوام و محد يهزبهم ..عرفوا ان رمضان يانا ..!
لو شفتوا من البلكونات و درايش البيوت التلفزيون شغال 24 ساعة ..عرفوا ان رمضان يانا ..!
لو شفتوا البنات دموعهن أربع أربع ..و مجابلين المسلسل ..عرفوا ان رمضان يانا ..!
لو شفتوا زحمة في المسايد .. عرفوا ان رمضان يانا ..!
لو شفتوا ناس أخلاقهم الصبح و الظهر و العصر زفته و مبوزين ..عرفوا ان رمضان يانا ..!
لو شفتوا بنيات و شباب يالسين على الرملة ..عرفوا ان رمضان يانا ..!
لو شفتوا السناتر و السينما ناس فيها ينعدون على الاصابع ..عرفوا ان رمضان يانا ..!
لو رحتوا ريحة لقيمات و باكورة و سمبوسة و ثريد .. عرفوا ان رمضان يانا ..!
لو شفتوا ناس ادينوا و يودوا القرآن في الشهر مرة و يصلون كل الفروض في وقتها ..عرفوا ان رمضان يانا ..!
لو قلت نسبة المغازل .. عرفوا ان رمضان يانا ..!
لو خف المكياج و القصص اللي طايره في الهواء و العباء المقصوصة ..عرفوا ان رمضان يانا ..!
لو شفتوا موظفين و موظفات ضرب رقاد في المكتب .. عرفوا ان رمضان يانا ..!
لو شفتوا ناس عقب الله أكبر سحبوا صلب من باكيت الجقارة ..عرفوا ان رمضان يانا ..!
لو حسيتوا الميزان أعلن وفاته .. و انكساره ..عرفوا ان رمضان يانا ..!
لو زاد الايمان عند حد .. و جدد عهده بربه .. و عطى قيمة للشهر .. عرفوا ان رمضان يانا ..!
لو طلعن صحون و خواشيق و ملال و قلاصات يديدة ..عرفوا ان رمضان يانا ..!
لو شفتوا البنت ادش المطبخ ..عرفوا ان رمضان يانا ..!
لو زادوا الخسوف في الجامعات و الدوامات و الشوارع ..عرفوا ان رمضان يانا ..!
لو شفتوا زلماية بس تلبس حجاب في هالشهر .. عرفوا ان رمضان يانا ..!
لو شفتوا هجوم كاسح على محل الجلابيات ..  عرفوا ان رمضان يانا ..!
لو ناس أخيرا حسوا بالفقراء .. و طلع من جيبهم بالحسرة فلس ..عرفوا ان رمضان يانا ..!
لو كثرة الشردات من الدوامات ..عرفوا ان رمضان يانا ..!
* * *
4 أيام تفصلنا على قدوم شهر رمضان الكريم..
و الحمد لله أن بنصوم شهره هاي السنة ..
و ما ندري لو السنة الياية بنكون من صيامه ..
احساس ثاني يوم يهل هلال رمضان ..
طقوسه مختلفة عن باقي الشهور..
ان كان من ناحية العبادة ..
أو الحياة اليومية بفعاليته ..
ذكريات رمضان كثيرة ..
جميلة..
بالنسبة لي ..
و خاصة اللي يوم كنا صغار ..
طبعا كل شيء كان في الماضي كان غير ..
تحس بطعم هالشهر ..
طرى على بالي لحظات حبيت أذكرها لكم ..
كنا نسهر في الفريج برع .. لين الفير ..
بنات و أولاد ..
مسوين “منامه” ..و المنامه عبارة عن بيت أو يلسة نسويها من الخشب ..
كانوا عيال خوالي يسونه ..
و نحن نيلس أنشوفهم ..
و في الليل كل حد ايب أكل ..
 أذكر البطاط ..
كنا نخليه على الفحم ..
و نيلس على “المنامه” و ناكل ..
و نلعب في الشارع .. و ياويل ويله اللي يخطف صوبنا ..!!
و من ايي “الرباع” اللي يقوم الناس حق السحور ..
نمشي وياه ..!!
و طبعا عقب الفطور لازم نتيمع بيت يدتي الله يرحمها ..
مشهوره “بالفرني”  و “خبر الرقاق” مالها ..
: (
أول رمضان من دونها ..
I wonder
أكيد ماله طعم ..!
و حتى العيد ..
أكيد ماله طعم ..!
أذكر يوم كنت طفلة .. و بديت أصوم من الصف الثالث
صمت الشهر كله..
الا أخر يوم ما صمته ..!!
P :
لازم أكون
Unique
يعت و كان أسحب لي كاكو معجون ..!!
و من هالصف بديت أصلي ..
و أقرأ قرآن ..
بس بشكل متقطع ..!!
الين ما قدرت أختم القرآن على بداية الاعدادية..!!
::
::
::
قلت قبل أني ما أحب الحلو ..
كل ما دشيت المطبخ أسوي كيكة ما تضبط ..
والله عمري ما فلحت ..!
بس الموالح أفلح فيه ..
بعدين شفت السالفة مصخت ..
شو يعني لازم كل رمضان أرتز في المطبخ و أفشل ..
قلت ما بسوي شيء ..
من أول سنة جامعة كانت هي أخر مرة أدش فيها المطبخ ..
و الطبخة كانت
Rice Crispy
و كلهم كلوا نتفة .. كان أشل الصحن و أعطي خالي ..!!
يحب هالحلو ..
و أول ما طعمه ..
قال الله ..
هاي الاكلة دوم أشتهيها و أنسى أسمها ..
و أبى حد يسويها ..!!
: )
تصدقون خاطري في عرسية ..!!
و في “رنجينا” ..
لين ألحين ما يابولي اياها
: (
من رمضان العام ..
لله يا محسنين ؟!
بيتنا ما يضيع .. طرشولنا لو طشونا ..!
كل عام و أنتوا بخير ..!
و تقبل الله صيامكم و صلاتكم و زكاتكم ..!
: )
و
Ramdan Will Miss you Grand Ma
Honestly, I Missed you More

::

::
باركولي خذت لي تلفزيون يديد ..
“يوم الثلاثاء بيركبونه” ..
و ريسيفر يديد ..
و عطوني
Free DVD
My Mum
قالت خذي يوم بنتحول بيتنا اليديد ..
OMG .. ما تدري أبى أشوف براطم و خشم شيماء علي عدل ..
P :
الصراحة شيء شاشات كبيرة حق
Plasma Screens
بس استخسرت اخذهن
باخذ الاكبر حق بيتي !
: $
خووو تفكيري مستقبلي بحت ..!
الغسالة عليه ..
و التلفزيون علي ..
الثلاجة عليه ..
و المكينة علي ..
الدعوة علي..
و البنتلي عليه..!!
P :
بذمتكم ما أنفع زوجة ؟!
::
خلاص باي ..!

 

 

 

محمد سعيد حارب 

كثار حبوا عمل هالشاب .. و كثار ساندوه .. و كثار قالوا ان التمثيل أو المسلسلات مب دوم هي اللي بتجذب الجمهور .. و ان الرسوم المتحركة هي من الاساس لكل الاعمار ..
مب بس لعمر معين .. يمكن شيء رسوم مقتصر لسن معين ..
و لكن الفريج كان غير .. كان لكل الأعمار ..
و كثار كان ودهم يعرفون من هم الشخصيات .. أو كيف كانت الفكرة في البداية ..و كيف تم التنفيذ؟
اذا أي مشروع نقوم به له ايجابياته ..ف أكيد في المقابل هناك سلبيات ..
أو هناك فئة ما بيعجبها عمل معين ..
ف نقول ..ان كثار كانوا يشوفون هذا العمل بأنه بسيط و لا يحتاج كل هالتهويل له ..
و ان ليش هالدعم كله لفلان ولد فلان؟
و ان هناك وايد قدموا مشاريع أكثر منفعة حق البلد بس تم رفضها ..
و كثار قالوا اسم محمد الثلاثي كان له الدور في نجاحه أو في تسهيل أشياء كثيرة ..
هذه الاشياء يمكن تطلع من خلال كلام أهل البلد ..
لكن يوم نشوف ان الخليجيين و بعض العرب يمتدحون هذا العمل ..
و يشجعون مثل هذه النوعية من الفكاهة ..
و هم من الاساس ما يعرفون من هو محمد سعيد حارب ..
ف هذا في حد ذاته انجاز كبير يحسب للشاب ..!!
ما ألوم أي فئة من الناس ان كانت رافضة أو قابلة لهذا العمل ..
لأن هي وجهة نظرهم .. و كل واحد يضع مقياس للنجاح ..
عن نفسي ..ما شفت كل الحلقات ..
البعض منها ..
كانت وجهة نظري ان العمل يستحق الثناء من ناحية انهم عطوا الشاب الاماراتي الحرية في تقديم مادة جيدة..
بدال المسلسلات التافهة .. و المستوردة من برع ..
و ليش أنتج دوم لهم .. و ما أهتم بالخامة الوطنية اللي عندي ..
و يتريا الواحد الفرصة السانحة عسب يبدع ..
مع احترامي لكل الدول اللي عندها الحين باع في التمثيل ..
لكن نحن بحاجة الى التنويع ..
في المقابل أتفق أيضا مع اللي قالوا اسمه بعد ساعده ..
لكن لو بنفكر فيها عدل ..
ان وايدين في الامارات و في الدول الثانية .. أبدعوا بعد مب لأنهم ولد فلان أو ولد شخصية مشهورة في وسط ما ..
يعني عادي لو مثلا  واحد يقدم شيء و يكون ولد ناس معروفين ..
لكن اللي قدمه شيء تافه ..
ما اعتقد بيتمون يجاملونه ..
أقل شيء بيبدلون القناة ..!
و لا ما بيكمل للموسم الثاني .. و أكيد الجمهور ما بيرحمه من التعليقات .. لو يكون من يكون ..!
شاءت الصدف ..
ان تكون لنا يد بما سيعرض في الموسم الثاني من الفريج ..
من خلال حلقتان اذا ما خانتني الذاكرة ..
طبعا الناس اللي يفهمون في الحقوق و الامانة .. و سمعة أي شركة وطنية ..
لازم يوم بتسوي مشروع مثل الرسوم و لا الافلام انهم اذا استخدموا شيء يتعلق بشركة معينة ..
يتصلون فيهم و ياخذون الاذن ..
او يطرشون رسالة ..
و هذا ما حصل مع الفريج و شركتنا ..
في المقابل .. تم توفير كل الصور و الامور اللي يحتاجها من صوبنا ..
كان جدا محترم في تعامله ..
حتى انه عرض علينا الحلقات و ذلك من حق أيا كان له صله بالموضوع ..
و كانت الحلقة جدا مضحكة ..
و بعض الاسرار قالها لنا ..
من دون أن يستكثر علينا ..
أنا أجزم ان هاي السنة .. الفريج بيكون أحلى من الاول .. و يستاهل هالشاب كل التقدير ..
لأن مب سهلة واحد يبتعد لأكثر من شهر عن بلاده ..
رايح و ياي رايح وياي من الهند ..
و يلس على كل كلمة يعلم الهنود الحركات ..
عسب يحركون الشخصية بالطريقة الصحيحة ..
و ان شاء الله  نشوف ابداعات ثانية من شباب ثانيين في الامارات : ) !

الصفحة التالية «