الكل مستوي ظالم  .. أو شايف الدنيا وردية في عيونه

و لو دقق شوي و لا قرب من فئة من الناس بيلاقي ان هناك من يعاني

هناك من يرمس و يرمس بس صدى صوته ما يوصل الا أخر حد لسقف بيته

و لا ينقطع الخط في ويهة و ينقال له الخير وايد

و محد مقصر و كفاية الزيادات الاخيرة

 و لا أنت مب ميت من اليوع

و لا مد ريولك على قد لحافك !

 انزين كم الواحد يمد ريله على قد لحافه؟ و يشوف غيره متهني

و يماشي كل تطور و كل رفاهية موجودة على وجه الارض

و هو بس مخول أنه ياكل هواء و يرضى باللي فيه

يعني أنت تطمح للي أبعد من كلمة حد

لكن غيرك يمد على قد لحافه؟ ! 

بعدين شو هاي الحكمة الساذجة اللي تطلب ايا كان بالقناعة

و في الكف الثانية يطالبون العالم في مواكبة التطور

صحيح ما يرفع راسه وايد و يختار طريق مب أهل له

بس على الاقل يحسن المستوى اللي كان عليه ! 

مب كل المواطنين ولدوا و في حلوجهم خاشوقة من ذهب

شرى ما يقولون .. ملعقة من ذهب

و مب كل المواطنين بيوتهم دورين و عيالهم ضارين على ريحة فرنسا و جزر المالديف

و متعودين انهم يغيرون ملابسهم ألف مرة في اليوم

و مخابيهم عامرة بالاوراق

و حاطين ريل على ريل و مجابلين شاشة الاسهم و التداول

أو عندهم برج و لا بناية و لا حتى قطعة أرض

   عسب نشوف الاسعار مرتفعة في كل شيء

من مواد أولية لين أدنى مادة تهم مجموعة تنعد على الاصابع  

صحيح كل شيء يتغير لكن بشكل معقول..

 اللي يالس يستوي شيء مبالغ فيه .. شيء ما يتنفذ بهاي السرعة دون مراعاة من المتضرر من هالشيء

و لا عددهم  ترى اللي يتضرر في الاول و الاخير هو  المواطن !  امارة ترفع من رواتب موظفينها و وصلت للعشرين و الثلاثين

و الخمسين حتى

 و امارة تزيد بالحسرة ألف و ألفين و ثلاث بس

و امارة تجاريهم و ترفع بكم صفر عسب تسكت مواطنيها 

و في الاخير هاي الزيادات شو الفايدة منها يوم أن الاسعار ارتفعت و السوق واصل حده

  كأنكم ما سويتوا شيء  ! 

بعدين واحد عنده شهادة ثانوية ألحين صار يستلم شيء و عشرين؟ 

خوش والله دفعة معنوية حق عيالنا أنهم ما يكملون التعليم العالي

 و يكتفون بتعليم المدارس و اللي صار ما عنده شهادة الا الاعدادية .. صار في الجيش يستلم معاش مدير 

و اللي عنده بكالوريوس أقل عنه؟ 

و اللي عنده ماجستير أقل عنه؟

 أي منطق هذا؟ 

في أي بقعة شفنا مثل هاي القرارات؟

 مب الا يفشل هالقرار .. الا يقهر !

 شهاداتنا الجامعية بنفرها عيل . . يا حسافة بس على السنين اللي ضيعناها

 : )

 بعدين منطق ثاني ما ينقال الا عندنا 

اللي يشتغل على سبيل المثال في تخصص قوي 

مب في الاعلام و لا الموارد البشرية و لا التجارة 

تخصص جي علمي بحت يستلم معاش شرات اللي يستلمه موظف عادي في البلدية؟

 يمكن بس يرتب الملفات و يأرشفها؟

 : S 

  خو الكل يدري ان كل شيء له مستوى معين

و امتيازات مختلفة بين شخص لشخص آخر

من مؤسسة لمؤسسة ثانية

بس عاد اللي مستوي لا له علاقة في التخطيط و لا في العقلانية شيء

خبط لزق  

 ناس تفرح .. ما علينا الله يسعدهم

و ناس مقهورة من السنين اللي قضوها في الجامعات

و صارت هباء منثورا 

خلاص الكل قرر ما يكمل دراسته و ما ينظم لمؤسسات معينة

كلهم بيدشون هيئة معينة لأن رواتبها خيالية

و ما تهتم بالدرجة العلمية 

واعلية عليهم بعد قاموا فئة يتحرطمون و يقولون الحياة غالية؟

مثلا فلان كان يستلم 6 ..و ألحين 20 .. زعلان ليش الحبيب؟ 

ترى الكل ماكل تبن و ساكت ! 

سواء ولد غني و لا ولد فقير ! 

 و صندوق الزواج رفعوا السقف مالهم لين 15 ألف

يعني اللي راتبه أكثر من 15 ما يساعدونه

لعنة تلعن العدو .. 15 صار بالنسبة لكم هم المحتايين بس؟

يعني اللي عنده الاعدادية في الجيش و وصل معاشه 20 ما بيحتاي؟

  عيل من هو اللي يستلم 15 ألحين؟

 اللي في الامارات الثانية و عندهم شهادات جامعية؟ 

خو قلنا الدنيا تغيرت و ما في شيء يتم على حاله لكن وين الانصاف ؟ 

 يا ليت بس يسون لنا حملة العطاء لداخل الدولة

ترى المباني لو علت و وصلت الشمس

من دون راحة الانسان ما تسوى و لا شيء ! 

و المواطنين يستاهلون كل خير ترى

 وايدين ميوعين و وايدين ايدهم على قلبهم و يخافون سقف البيت لا يطيح عليهم

و لا عمرهم اشتروا بدلة تساوي 1000

خلونا قبل لا نفكر في تطوير الدولة من ناحية العمران

نطور حالة المواطن للأحسن

عسب لا شاف مثل حملات العطاء ما يتغصص

الا يبادر باللي يقدر عليه ! 

 خو يا ليت اللي منعم الله عليهم شراتنا شوي يمتلكون من الرحمة

و يحسون بعيال بلادهم

لا صدر قرار و يمكن يكون شوي ضبابي

 خل اللي حواليهم يفتحونه شوي

ينورونه .. مب كل شيء وردي وردي

لازم شيء أسود في أي بقعة 

حطوني يوم بس في المجلس

بدون كرسي ..بتم واقفة طول الوقت

بقول كم نقطة أشوفها مقطعة قلبي

خو لا يغركم اللي يقول اللي مرتاح ماديا من الشعب ما يحس

ركزوا على الشعب ها

يحس .. منهم من يحس و منهم طاف

بس أحس .. نحس .. يحسون

بأي صيغة ..

 شركة من هاي الشركات اللي عندنا.. اللي ربحها في اليوم مليار

لو بس تعطي 1000 عايلة مليار شو بيستوي؟ 

خارج الحدود 

 فلسطين اللي هي فلسطين من استوت و الناس تعطيهم شو سوو بالبيزات؟ 

و لا شو بيسون ؟

 يشترون حصى و لا نشابة؟

بعد خارج الحدود

أهدي الصورة للي ماسك اقتصاد الدولة

و أقول صباح الخير يا وزيرة

!

Advertisements