الين اليوم ..

 و أنا أكح و أمسح خشمي بالكلينكس

و صداع الحمة لا يطاق

الين اليوم و أحس اني خلاص انتهيت

شهر ابريل كان جدا جامد

على قلبي على راسي

على جسمي و أحاسيسي .. آخر شيء بشارك في شاعر المليون !!

و السبة الدوام .. رحمة يا ناس

كنت و لازلت شغالة على 4 مشاريع كبيرة في شهر ابريل

لا و القهر كلهم وراء بعض

أول مرة أحس أن ابريل ولد حرام

: (

هالأسبوع خلصت مشروعين

Careers Fair

و

Graduation Ceremony

اثنينتهم هم على القلب .. شغلهم وايد يحتاج الى صبر

و أنا ما عاد فيني صبر و لا عقل حتى

أخ راسي .. لو حد يدق فروة راسي ..جهنم جهنم ..!!

 

أخ خشمي .. نزيف مستمر ..!!

 

امسات قالولي أيب شاي حمر و أحط زنجبيل و عسل فيه

عسب الكحة تخوز .. يربت و الحمدلله أهون

لكن الزكام شو دواه ألحين؟؟

و الحمة بعد؟؟

 

قبل .. لا اتصلوا فيني .. كروان .. ألحين يبندون الخط يتحرون مغلطين ..!!

 

خلوني شوي أعبر .. و أخربط .. ترى باقي مشروعين في آبريل

 

The Global Travel & Tourism Summit

 

و

 

Arab Forum

 

يا أختي يا أختي .. شهر منيل و مشاريع منيلة ..!!

و توني رادة من مهمة وظيفية .. و في عز اجازتي..!!

 

بس محد ملطف و مسهل علينا كان في معرض التوظيف غير ” خ “

 

هيه عليكم نور .. صاحبنا مال معرض الطيران

 

وحليله .. !!

 

مستوي مشهور في المدونة ..

 

لا دشيت المسنجر .. و شفت حد من المدونات

 

يسألن .. شخبار خ ؟

 

LOOL

 

شو آخر سوالف خ ؟

 

واعلية عنده كاريزما مب طبيعية .. حتى في النت يونس الناس

 

LOOL

 

خ: صباح الخير أمي

أنا: هلا صباح النور

خ: اندوج شنطتي .. خلي عينج عليها .. بسير المخزن ألمع الجوتي

أنا: خخخخ

خ: زين؟ يلمع الجوتي؟

أنا: تمام

 

 

قليلا و يأتي م .. هو زميل خ في العمل

 

م: السلام عليكم .. يلعن أبو الرمل .. عنبو باركنات آخر الدنيا .. لحظة بنظف الجوتي

 

أنا: مندهشة لأن الاثنين ماشاء الله عليهم بروش الجوتي في مخباهم ..

صدق صدق عيال جو و سماء

 

خ: خخخخ شفتي كيف نحن متفاهمين؟

 

م: يرفع ريله و ينظف أشكرا جدام الناس.. زين جي؟

 

خ: يا ابوك فشلتنا ..كريرز فير .. و بنيات و شباب و عفسه .. نزل ريولك ..!

 

م: اطاع هذا .. الافتتاح الساعة 11:30 تونا 8:30

 

لحظتها اتي بنت اعرفها .. ” س ” .. معرفة سطحية لانها كانت في نفس المدرسة

 

 

س: Hello

 

نرد التحية .. س: أنا شكلي أعرفج

 

أنا: هيه مال مدرسة الاتحاد .. صح؟

 

س: ايوا .. ننعرف من الويوه

 

أنا: خ و م .. س بتمسك مكان فلانة في الشغل

 

خ: أهلا و سهلا

 

طبعا يطيح الحش و القرض في البنات و الشباب .. لان هذا المعرض

 

مب بس للوظائف .. للكشخة و الزقرتة ..

 

و ناقص بس عروس و معرس و نحن في أحلى قاعة عرس ..!!

 

تبدأ لغات العيون .. بين فئة من الموظفين يكرهون الفئة الثانية

 

دموع من الضحك ..!!

 

بس خاطري اعرف من اخترع المجاملات في هاي الدنيا؟!

 

و يبدأ في المقابل .. الكراف .. و الركضة من مكان لين مكان ..!!

 

خ : الشيخ وصل

 

م: وابوك يا الأبو .. القهوة القهوة

 

خ: عطني الدلة و الفنيان و أنت خلك بعيد .. نبى ويوه حسنة

 

م: يضحك .. اندوك علك تترخطف جدامه و ما يشيلونك

 

خ: اشفطططططططططط ..!!

 

أنا: أقول في خاطري .. شو هاي المصطلحات الشبابية العجيبة و أكتشف ان اشفط

الكرشة خخخخ

 

س: ياين صوبنا .. ابتسموا

 

أنا: ما فية .. أخاف أطلع هبلة في التلفزيون و أنا جي شاقة الحلج ..بسير بعيد

 

خ: يا الويه تمي .. لا تخلين أم السعف و الليف تلصق ..لازم أنتي في الويه

 

أنا: واااااااي شخباري.. !!

 

م: خخخخخخخ تعرف بعد

 

و كلنا نشق الحلج 100 سانتي .. لان الشيخ وقف عندنا

 

خ: اخ ويهي

 

أنا: شو السالفة

 

خ: ما طاع يشرب القهوة خخخخخ

 

 

م: حوباتي ولد عمي

 

 

س: خخخخخ .. عن اذنكم بسير أتريق

 

خ: آنسة تبين ريوق .. يايبين بلاليط

 

أنا: ما أحب البلاليط.. بشرب كوفي

 

م: أنا ساير

 

أنا: ممنوع يا ريال .. والله أنا بتبهدل و بيعقونها على راسي شو بلاليط و محلى

و لقيمات و جامي يايبين هنا .. خو خلوا مكان برع و بنتيمع مب على الستاند

 

LOOL

 

ترى من واجبي اني اضبطهم لكن من التعب كل شيء كان حلال في

هالمعرض..!!

 

 

خ: لا كتبتي التقرير .. قولي كل اللي في خاطرج

 

أنا: تم

 

. . .

 

م: سرتوا فريج البستكية؟

 

س: وين؟

 

م: ستاند الفطيم خخخخخ

 

أنا: بعدهم على البراجيل .. الصراحة ستاندنا أحلى

 

خ: مداح نفسه .. عسب مشروعج

 

أنا: فرحان أوي يعني؟

 

خ: لا والله. . آسف

 

أنا: لا تعيدها

 

LooL

 

خ: أقول ؟

 

أنا: ها ؟

 

خ: شو رآيج يوم الحريم يمسكون مناصب في أي شركة

 

أنا: تبى الصراحة؟

 

أنا: مب كفو هالشيء .. أغلبيتهن يخقن .. و أونهم قواية في الشغل

و كله خربطان و تمثيل و 80 بالمئة من حصلوا الكرسي يفصخن الحياء

 

خ: خخخخ .. بعد؟

 

م: صدقها .. شيء محترمات لكن هذا نادر .. ما أنتقص من قدرهن

بس هذا الواقع

 

أنا: والله أنا بنت لكن أشوف الريال المواطن أحسن انه يكون مدير..يا أخي يفكر بعقله

ما يغار ما يحاول يخرب عليك شيء

 

خ: I agree with you totally

 

..

 

ساعات تمر . .

 و يبدأ حديث آخر

 عندها نلتقط أنفاسنا عند خروج المارة

 

 

م: يا حافظ من عرفتج و أنتي مريضة

 

أنا: اسكت يا ريال .. هالمرة مادري ليش ما يفج المرض عني

 

م: شوفي أختي سيري عند دكتور سليم في عيمان ..ابرتين بس و انتي رادة دبي حصان

 

D :

 

أنا: أنا عيمان ما طبيتها من 3 سنين

 

م: هي أمي اللي من دبي شو يبى في عيمان خخخخ و لا دهني ريولج بفكس

قبل لا ترقدين .. و صدقيني بتتشافين

 

أنا: شكلي بسوي جي

 

م: و لا أقولج باجر بيب وياي دواء العيوز من الطب الشعبي .. !!

 

أنا: يا خراااااااشي .. لا يكون مر

 

م: فيه شوي زموته ..!!

 

أنا: اسمع عنه بس ما عمري ذقته

 

يمر اليوم الثاني و زميلنا قد أحضر الدواء

 

و يلتفت الجميع حولي

 

يريدون تشجيعي على الشرب

 

أنا: يخرب بيتكم .. حفلة حفلة؟؟

 

خ: خوزوا عنها صدق .. بتتروع البنت

 

تختفي س

 

تختفي ح

 

تختفي أ

 

و يختفون الشباب

 

و بخطوات خفيفة أدخل المخزن .. ما أن فتحت رأس الكوب

 

واذا بي خ قد أقبل

 

أنا: أكملت . . خير ؟!

 

خ: خخخخخخ .. يا حرمة اشربي مرة وحدة .. أخاف اطيحين و محد يدريبج

 

أنا: عن الكلك .. متعوده على هاي المشروبات أنا

 

خ: بعطيج ظهري عسب ما ترجعين في ويهي خخخخخ

 

أنا: لو سمحت اطلع

 

خ: أوني ما أشوف بيلس على لاب توب

 

و أمسك أنفي .. مسكة قوية

 

و أشرب الريد بول الشعبي .. بكل ما أوتيت من قوة

 

واااااااااااااااااي

 

خ: شو استوى؟؟

 

أنا: الله يهديك يا م .. من بواليع عيمان ظني يايب

 

واااااااااااااي لوعة كيف يشربونه هذا

 

بعد دقائق أحسست بدوران الأرض .. !!

 

أغمضت عيناي ..

 

لدقيقة ..

 

و ما أن فتحتها الا و أرى خ قد “اشلق” في وجهي

 

حركته المعتادة

 

ضحكت من خاطري

 

أنا: والله انك أنتيكة ..!!

 

..

 

 

س: فقدناج البارحة .. المعرض بدونج ما يسوى

 

خ: هي أنا قلت لها نفس الشيء

 

أنا: استاذة .. استاذ .. مشكورين .. كانت فعالية ثانية تدرون

 

خ: اليوم آخر يوم .. بس ما تحسون مب زحمة؟

 

س: فرق شاسع عن السنين الماضية

 

أنا: هي .. العام يالله شكثر زحمة

 

خ: دروا أن كله مقصة

 

أنا: تدري مديرة الموارد البشرية اللي في المؤسسة الفلانية تقربلي

 قالت العام حصلوا فورمز قد شعر راسك ..

ما قبلوا منهم غير 7

و من هالسبع محد داوم خخخخخخ

 

خ: شفتي .. كله دعاية ..!!

 

س: حتى أبوي قال .. قاصين على الخلق ..!!

 

أنا: والله شوفي .. في منهم يوظفون .. بس مب عدد شاسع يكون على أصابع

 

خ: شو الفايدة عاد؟

 

كان زميل آخر يسترق السمع

 

لا و مسمينهم بذرة الوطن

 

م: هي زرعوهم زرعوهم و خلاف يطلعون شقر بدال عيال البلاد

 

خ: خخخخخخخ

 

س: خخخخخخخ

 

أنا: شكلنا بنتسفر عن قريب

 

D :

 

 

. . .

 

 

زميلة اخرى من قسم الاعلام

 

من عائلة كويتية معروفة في الوسط الاعلامي

 

انتقلت للعمل في شركتنا

 

أتت بأهلها الى المعرض

 

مع أن المعرض مخصص فقط للمواطنين

 

و لكن نحن بامكاننا تسجيل الجنسيات الاخرى و هذا طبعا مب معلن عنه

 

فالزميلة لا تعلم عنه أيضا

 

هي: يصير يسجلون

 

أنا: اييييييي اشدعوه يصير .. خليجنا واحد

 

D :

 

خ: عن الخرط ما يستوي أختي

 

أنا: يا خ هاي اداوم عندنا .. أنا برمس راعية الموارد البشرية عنهم . . ماعليه

 

هي: هذا ولد أختي و الثاني ولدي .. الاول تخرج من أمريكية دبي و الثاني يدرس بعده

 

أنا: خلاص خليهم يعبون الفورم هذا و ان شاء الله خير

 

خ: يهمس لي.. كوايتة ها؟

 

@:

 

أنا: أهمس .. اللي يقول باجر بيتوظفون ..كثر ما تقدر عطى الناس شوي من الأمل

 و لا تكسر مياديفهم

 

خ: اشوي اشوي عن يشلنا البحر بس

 

أنا: يابوك الكوااااااااااااايتة غير .. !!

 

LOOL

 

نخلص منهم

 

و أقوله قصة الكوايتة

 

شوف “خ” مرة كنا سايرين القرية العالمية

 

عاد في القرية .. كل وحدة و لاصقة بريلها و لا خطيبها و لا أي حد من الجنس الخشن

 

و تموت البنت لو ريلها شاف غيرها

 

جي عادي تطالعك بنظرة حقيرة

 

خخخخخ

 

المهم كنا واقفين عند كشك نشتري شيء

 

يوا 2 كبلز كوايتة

 

في نفس اللحظة بدأت القرية تلبق الشلق

 

أنا أقول حق بنت خالي شوفي الشلق وراج

 

الولد سمعني .. قال أنتوا تقولون حقه شلق؟

 

قلت له هي .. و انتوا تقولون جرااااااااغي

 

ضحكنا كلنا

 

حرمته تقول .. ماشاء الله تعرفون حجينا

 

قلت لها هي الله يخلي المسلسلات

 

قالت زين شي كلمة ثانية تقولون حق الشيلة

 

قلت هي وقاية بس مناطق معينة في الامارات يقولون

 

ريلها يقول يا حلو رمستكم خخخخخ

 

درنا ظهورنا نشوف المنتجات

 

و راعي الكشك يعطينا بروشر محله

 

يقول الكويتي أي الحين يبدأ شغل الحريم

 

و حرمته عادي تضحك

 

صاصرت بنت خالي .. قلت لها شوفي يوم أقولج

 

الكواااااااااااااايتة غير ..

 

مب لو حد من ريايلنا سولف ويا البنات

 

عادي الحرمة طالبة الطلاق

 

LOOL

 

خ: و أنتي أولهم !!

 

أنا: كل شيء يجوز ..!!

 

LOOL

 

. .

 

يمتد السكوت أرجاء المكان

 

نجلس قليلا لنرتب الأوراق

 

تأتي فتاة .. ترتدي شيلة و عباء لنادي الوصل

 

أقول حق وحدة

 

يا الله وين تبى !!

 

يأتي زميل آخر .. شو هالناس همهم الكرة

 

أرد عليه .. الحمدلله طبت من هالمرض

 

يقولي أهلاوية و لا وصلاوية؟

 

ترد عليه البنت .. ما تعرف أنها أهلاوية قح

 

و تسألها بعد

 

ابتسمت .. أهلاوية .. لكن خلاص بطلت مشاهدة المباريات

 

و عادي الفوز كان بالنسبة لي

 

مادري خلاص استويت أنثى ما أتابع هاي السوالف

 

خ: 12 ديك يركضون وراء الكرة

 

أنا: لا أول مرة أشوف شباب جي عقال !!

 

LOOL

 

. .

 

شوي و ايون شباب يبون يقدمون على وظيفة

 

واحد منهم لابس قميص وردي

 

و الشعر سبايكي

 

م: هايل بذرة الوطن .. حياكم الله

 

LOOL

 

. .

 

سرحت في المارة

 

كم هي الدنيا صغيرة

 

تمر وجوه أراها يوميا أو بالصدفة في أماكن ما

 

في الصالون

 

في الشارع

 

في المحل

 

في لندن

 

شو السالفة؟ لهالدرجة المواطنين شوي في البلاد؟!

 

. .

 

!!

 

سوالفهم ما تنتهي .. فيها عبر و حكم

نسمع رأي الجنس الخشن

و نسمع رأي الجنس الناعم

و تكتشف أن في الناس ثقافتهم جدا عالية

و ناس تفكيرهم ما يوصل الا سقف المعرض

همهم الزينة و التزقرت

و عادين المعرض .. سنتر للتجول فيه

ربي لا تبلينا بس

 

!!

 

 

Advertisements