نواري زميلتي في العمل .. في السابق كان بيننا فقط التحية و الابتسامات

و بعض المهمات الوظيفية !

 

تمر الأيام و تقوى العلاقة .. لتصبح واحدة من اللاتي أعطيهن الضوء الاخضر

في الحديث و السؤال و تجريحي بالمزاح !

 

رغم أنها تكبرني بسنتين الا أن ملامحها الطفولية

و طبعها العفوي و المرح

و ستايلها المميز

ذكرني بصديقة من صديقات الحياة و المدرسة ..

لأسألها حينها هل تعرفين حصة م ؟

ابتسمت و قالت أنا صديقة قريبتها عائشة س؟

قلت يا سبحان الله

الدنيا فعلا صغيرة.. ترد  و تقول و أنت هل تعرفين شما م ؟

قلت لها صديقتي في الجامعة كانت

قالت تلك المجموعة أيضا تربيت معها

قلت اذن من هي زهرة ؟

قالت عمتي .. قلت صديقة الوالدة

ابتسمت .. و أعطتني نظرتها المعهودة .. أتعلمين من يرى وجهك يشعر بالسكينة!

غاصت ملامح وجهي لأرى عصافير تتطاير حول رأسي

 نورة .. سمعت هذه العبارة كثيرا !

مروة .. يا متكبرة !

 

; )

 

 

تكثر أحاديث البنات .. و في كل صباح و ظهيرة

نتناول قصة ما .. لتخبرني هي عنها

أو أخبرها عن ما يصادفني في العمل أو خارجه

لكن القصة التي أضحكتني جدا

قصتها مع النقاب ..!

 

 

نورة: مروووه تصدقين كنت متنقبة أيام الجامعة و عقبها بفترة عقيت!

 

لترجع مرة أخرى العصافير حول رأسي

 

مروة: نورووووو أنتي كنتي متنقبة !

 

نورة: لا و عويش بعد هاهاها !

 

مروة: سيري لا .. عمري في لندن ما شفتها متنقبة

 

نورة: لا والله السنة اللي تنقبنا فيها .. كانت بعباتها بعد .. و تلعوزت وايد .. و تدرين

أهلها مب من النوع اللي يشجع على النقاب ..ف لاقت صعوبة شوي .. عكسي أنا اللي في بيتنا

كلهن يتغشن .. أنا ألحين الصايعة الوحيدة بينهن ها ها ها !

 

مروة: تصدقين لين ألحين مب مصدقة .. مادري أحس أول مرة أيلس ويا وحدة مرتدة هاهاهاها!

 

نورة: أف لو تدرين كيف تنقبنا .. كانت شلل في الجامعة .. توزع منشورات

يحثون البنات على وايد أشياء و من بين هالشيء النقاب ..

و تدرين تأثيرهن كان وايد قوي .. و لين ألحين !

عاد نحن قلنا بنتنقب .. و دخلنا وياهم في الحزب .. بس كنا مب متشددات

ما نقول لا شفنا بنت فل مكياج استغفر الله استري عمرج

و لا ماذا تفعلين يا أختاه توبي ها ها ها !

 

 

مروة: احمر وجهي من الضحك ليس على كلامها و انما

على التعابير المرسومة على محياها ..انزين نوروو ليش عقب فصختي النقاب؟

 

 

نورة: شوفي أنا فصخت لأن ما امتلك الارادة الحقيقية.. و ما كانت هناك رغبة شخصية و انما فرض من بعض الصديقات .. و أن المسألة معروفة مب حرام !

 

 

مروة: و عويش؟

 

نورة: ها ها ها .. عويش التهبت عيونها .. فترة طويلة تعاني ..لين ما أكتشفت

انه من النقاب !

 

: S

 

مروة: و بعدين شو استوى؟

 

 

نورة: عقبها بفترة يوم شافونا البنات في الجامعة .. أعلنوا ان دمنا حلال هاهاها

لا .. يواجهونا بنظرات جدا حقيرة .. و كلماتهم اللاذعة كانت مثل النشيدة

على مسامعنا .. حتى وحدة واجهتني و قالت حرام اللي اسوينه يا نورة اتق الله

و ليش عقيتي الغشوة …الخ أما تخشين الله؟!

 

تصدقين ألحين و لا وحدة منهن تسلم علينا

خاصة اذا شافونا في المراكز و السناتر !

 

مروة: شوفي أنا قبل يوم أشوف وحدة متنقبة كنت أظن هاي هي ..

يعني خط مستقيم في الدين.. تفكير سطحي !

لكن أيام الجامعة كنت في المصلى .. و أسمع وحدة متنقبة تقول حق الثانية

شفتي حلقة امس مال المسلسل المكسيكي ..!

لفيت ويهي أشوف شما .. و قلت لها متنقبة و مكسيكي؟

تقولي يا ذكية يعني تتحرين كلهن ربي و قرآني !

من هاك اليوم يا نوروووو عرفت .. كنت على نياتي ..!

 

 

نورة: هاهاها .. بس تصدقين محطة ما تتنساش !

 

مروة: اختلف العلماء في منهم يحللون الوجه و الكف

و في منهم يقولون حرام و لابد الستر .. أنتي ويا أي رأي .. و أي مدرسة؟

 

LOOL

 

تقاطعني الاخت

 

 

نورة: بس صخي ..!

 

LOOL

 

مروة: ما لبستي قفاز بعد؟

 

: $

 

 

نورة: لا تطنزين !

 

: (

 

مروة: حبيبتي .. لا تخلين غيرج يصلح فيج

صحيح النصيحة حلوة .. بس أنا اللي أشوفه هالزمان مولية ما يطبق هذا المبدأ..

و مب كل وحدة ادز بويهة

و ترمس عن الدين .. قلتي هاي هي

و لا قالت اللي اسوينه غلط

ترى أغلبهن الغلط راكبنهم من الراس لين الساس

هم مهتمين في غيرهم أكثر عن نفسهم

متى ما أنتي تبين تتغيرين للاحسن في أي جانب

لازم من نفسج .. في ارادة .. في شيء داخلج يقول هذا الصح و هذا الغلط

وخذي الرأي الصح من عالم دين تثقين فيه !

 

 

نورة: صحيح ..!

 

مروة: بس بذمتج كنت متنقبة؟

 

LOOL

 

نورة: لا و آخر خطيب يايني كندورته قصيرة و لحيته لين بطنه .. و يقول ما ابى تلفزيون في البيت

ما قال ما أباها اداوم .. و لا ما أباها تحط مكياج .. أونة ما أبى تلفزيون في البيت

ليش أنا شو بشوف ؟!

 أوهوووووووووو .. بس لا .. ندمت أني قلت لج هاهاها !

 

 

 

* * *

 

SMS

 

من بنت جميرا

MarwOo Yal Ga63aH Wainch Ma TbyneeN,,I MISS YOU !

 

REPLY

 

من دبي

LailOo MawjooDa, Enty Ely WainCh !?

 

للمسجات بقية

 

 

مقصر يا صديق في الوصال

لا تلومني

كل يغني على ليلاه

مرة شرق و مرة غرب

عمر الحياة ما كانت شرقية غربية

 

: )

Advertisements